قازاقستاندىق جۇلدىزدار بەينەباياندارىن قانشا قاراجاتقا تۇسىرەدى

استانا. قازاقپارات - زاڭى قاتال شوۋ-بيزنەستە «جۇلدىزىڭ جانۋ» ءۇشىن حيت ءان مەن ساپالى بەينەبايان اسا قاجەت.

سوندىقتان بولار، انشىلەردىڭ باسىم بولىگى ءجيى بەينەبايان ءتۇسىرۋدى ادەتكە اينالدىرعان. ءتىپتى، سوڭعى ۋاقىتتا ولاردىڭ كليپمەيكەرلەرگە قوياتىن تالاپتارى دا تىم جوعارى.

بۇل تۋرالى 31- ارنا حابارلايدى.

- «ادەتتە، انشىلەر ءبي بولسىن دەپ تالاپ قويادى»، - دەيدى پروديۋسەر، كليپمەيكەر تيمۋر بالىمبەتوۆ.

ال، ساپاسى سىن كوتەرمەيتىن ءان باياندار قايسى؟

- «ءانىنىڭ ماعىناسى ءبىر بولەك، وعان تۇسىرىلگەن كليپى تىپتەن بولەك ءان باياندار جەتەرلىك»، - دەپ ءوتتى جۋرناليست جان احماديەۆ.

وسى اپتادا تانىمال ءانشى بۇركىت ونەردەگى ارىپتەستەرىنىڭ باسىن قوسىپ كەش وتكىزدى. كەش ۇيىمداستىرۋىنا سەبەپ بولعان ونىڭ سوڭعى بەينەبايانى. «اگۋگاي» اتتى انگە تۇسىرىلگەن كليپى ادەتتەگىدەن وزگەشە ەكەن.

- «ءوزىمىزدىڭ ۇيرەنىپ قالعان ستيلىمىزدەن وزگەشەلەۋ. ءبىز تەڭىزدىڭ جاعالاۋىندا رومانتيكا تۋرالى ءتۇسىرۋشى ەدىك، بۇل جولى اتىس، جارىلىس، بىزگە تىم قاتىسى جوق»، -  دەيدى ءانشى بۇركىت.

ءيا، بۇركىت كورەرمەنىن ۇنەمى جاڭا بەينەبايانىمەن قۋانتىپ وتىرادى. ءارى ءبىر-بىرىنە ۇقسامايتىنداي ەتىپ، ەرەكشە ۇسىنۋعا تىرىسادى. الايدا، ولاردىڭ شەتەلدە تۇسىرىلگەن بەينەباياندارىن سىنايتىندار جەتەرلىك ەكەن. تانىمال جۋرناليست جان احماديەۆ بۇركىت پەن ايشانىڭ تۇسىرگەن كليپتەرىن ءبىراز سىنعا الدى.

- «وزدەرى قىدىرادى. ءسويتىپ، وزدەرى كليپ ءتۇسىرىپ كەلەدى. اسىعىس تۇسىرگەن بەينەبايان ەشقاشاندا ساپالى بولىپ شىقپايدى. ءتىپتى، كەز-كەلگەن جەرىندەگى راكۋرستارىن قاراساڭىزدار ستاتيچنىي الا سالادى استىنان، ۇستىنەن. ءسويتىپ، ەكى، ءۇش پلانمەن كليپ جاساي سالادى»، - دەيدى جان احماديەۆ.

بۇركىت كليپتەرىن ۋاقىت وزدىرماي جىلدام جاسايتىنىن جوققا شىعارمايدى. نەبارى ءبىر، ەكى كۇننىڭ ىشىندە تۇسىرە سالادى ەكەن. دەگەنمەن، ونەر يەسىنىڭ ءاربىر جۇمىسى وزىنە دە، كورەرمەننىڭ دە كوڭىلىنەن شىعاتىنىن العا تارتادى.

- «كوپ ادامدارعا ۇنايدى، سىزدەردىڭ ارقالارىڭىزدا جارتى ەلدى ءبىلىپ قالدىق دەپ»، - دەيدى بۇركىت.

سونىمەن قاتار جاقىندا قۇرىلعان «BN» اتتى توپتىڭ بەينەبايانىنداعى جاستاردىڭ ءبىر-بىرىنە بوياۋ شاشىپ ويناعاندارى جان احماديەۆتىڭ قىتىعىنا قاتتى ءتيىپتى. ونىڭ ايتۋىنشا، جاس توپ ءۇندى ەلىنىڭ سالت-ءداستۇرىن اشىق تۇردە ناسيحاتتاپ ءجۇر.

- «ءۇندىنىڭ حولي مەرەكەسىن دارىپتەپ جاتىر، نەگە ءوزىمىزدىڭ ءداستۇرىمىزدى دارىپتەمەسكە. كامشات جولدىبايەۆا دا ءۇندىنى دارىپتەپ ءجۇر»، - دەدى جان احماديەۆ.

بۇل جىگىت مەكتەپ وقۋشىلارىنان قۇرالعان «BN»  توبىنىڭ ديرەكتورى ەركەبۇلان مولداشوۆ. شارىن شاتقالىندا تۇسىرىلگەن بەينەبايانعا 25 مىڭ دوللارعا جۋىق شىعىن كەتكەن. بەينەباياننىڭ يدەياسى ەركەبۇلاننىڭ وزىنە تيەسىلى ەكەن. بوياۋ شاشۋدى ەش ەرسى كورمەيدى.

- «ءبىز ونداي ۇقساستىق كورمەدىك. ەگەر ۇقساستىق كورسەك ونى پلاگيات دەپ اتالىنادى. ول نارسەنى جاسامايتىن ەدىك، - دەيدى «BN» توبىنىڭ ديرەكتورى.

بۇگىندە بەينەباياننىڭ ەكى ءتۇرى كوپ تۇسىرىلەدى ەكەن. ءبىرىنشىسى، ترەيككە قۇرىلعان بەينەبايان. ياعني، ءانشى كەلبەتىن جالپاق جۇرتقا ەتەنە تانىتقىسى كەلەتىندەر وسىنى تاڭدايدى ەكەن. مۇنداي كليپتىڭ نارىقتاعى قۇنى 5 مىڭ دوللاردان باستالىپ 15 مىڭ دوللارعا دەيىن باعالانسا، ەكىنشى ءتۇرى ارنايى سيۋجەتكە قۇرىلعان. ونىڭ نارىقتاعى باعاسى 15 مىڭ دوللاردان - 30 مىڭ دوللارعا دەيىن جەتەتىن كورىنەدى. ال ەگەر ءارتۇرلى ەففەكتىلەردى نەمەسە گرافيكا قولداناتىن بولسا كليپتىڭ قۇنى دا جوعارىلايدى.

بۇگىندە كليپمەيكەرلەرگە انشىلەردىڭ قوياتىن تالابى جوعارى ەكەن. اسىرەسە، ساپاسى جوعارى بولۋىمەن قاتار، ءبي توپتارىنىڭ كوپتەپ قاتىسۋىن تالاپ ەتەتىن كورىنەدى.

- «مىسالى، ءبىز جاقىندا ءمادينا ءسادۋاقاسوۆاعا كليپ تۇسىردىك. ول كىسى العاش رەت بيلەدى سول كليپتە، - دەيدى كليپمەيكەر، پروديۋسەر تيمۋر بالىمبەتوۆ.

4 جىلدان بەرى شوۋ-بيزنەس وكىلدەرىنىڭ كوڭىلىن تاۋىپ، كليپ ءتۇسىرىپ جۇرگەن جاس كليپمەيكەر بەكزات وسپانوۆ انشىلەردىڭ تالاپتارىنان بۇرىن، شىعارماشىلىق ەركىندىكتە جۇمىس ىستەگەندى ۇناتادى.

- «بوستاندىق بەرگەن دۇرىس. ءوزىنىڭ جۇمىسىنا دۇرىس قارايتىن انشىلەر رەجيسسەرگە بوستاندىق بەرەدى»، - دەيدى كليپمەيكەر بەكزات وسپانوۆ.