08:59, 05 - قىركۇيەك 2016 | GMT +5
ۇلى بريتانيادا جۇزدەگەن بوسقىن بالالار ءىز-ءتۇزسىز جوعالىپ كەتتى
استانا. قازاقپارات - ۇلى بريتانياعا بوسقىن رەتىندە كەلگەن جۇزگە جۋىق بالا ءىز-ءتۇزسىز جوعالىپ كەتتى، دەپ حابارلايدى بريتاندىق Independent باسىلىمى جەرگىلىكتى ىشكى ىستەر مينيسترلىگىنە سىلتەمە جاساپ.
باسىلىمنىڭ اقپاراتى بويىنشا، سوڭعى 5 جىلدا ەلگە ۇلكەندەردىڭ قاراۋىنسىز 10 مىڭعا جۋىق كامەلەت جاسقا تولماعان بالالار كەلگەن. ولار وتاندارىندا بولىپ جاتقان سوعىستان، اشتىقتان قاشىپ، بوسقىن بولعان. جاڭا ورىنداردا ولاردى بالالار ءۇيى مەن اسىراپ العىسى كەلگەن وتباسىلارعا جىبەرەدى. ال الەۋمەتتىك قىزمەتكەرلەر ولاردىڭ جاي-كۇيىن باقىلاپ وتىرادى.
باسىلىم بالالاردىڭ جوعالىپ كەتۋى ادام ساۋداسىمەن قاتىسى بار بولۋى مۇمكىن دەپ جازادى. ەۆروپول اگەنتتىگىنىڭ مالىمەتتەرى بويىنشا، ەۆروپا اۋماعىندا 10 مىڭعا جۋىق بالا ءىز-ءتۇزسىز جوعالىپ كەتكەندەر قاتارىندا.
