استانا مارافونى مارەسىندە پاۆلودارلىق جىگىت بولاشاق جارىنا نەكەلەسۋگە ۇسىنىس جاسادى

استانا. قازاقپارات - استانا مارافونىندا 42,2 شاقىرىمعا قاتىسقان سلاۆا دەمچەنكو ەسىمدى جىگىت مارە سىزىعىنان وتكەننەن كەيىن بولاشاق جارىنا نەكەلەسۋگە ۇسىنىس جاسادى.

«مارافونعا قاتىسۋ ءۇشىن ارنايى پاۆلوداردان كەلدىم. سونىمەن قاتار وسى ماڭىزدى شارا اياسىندا سۇيىكتى قىزىما بولاشاق جار بولۋى ءۇشىن ۇسىنىس جاسادىم. وسى توسىن ۇسىنىستان كەيىن كوزىنەن قۋانىش جاسى مولدىرەپ تۇرعانىن بايقاپ تۇرمىن»، - دەدى جاس جىگىت «قازاقپارات» تىلشىسىنە بەرگەن سۇحباتىندا.

ءوز كەزەگىندە س. دەمچەنكونىڭ ۇسىنىسىنا ۇناتقان قىزى تۇرمىسقا شىعۋعا كەلىسىمىن بەردى.

مارافون قاشىقتىعى استاناداعى ەسىل، الماتى جانە سارىارقا اۋداندارىن قامتىدى. وسى رەتتە سپورتتىق شارا 4 ساناتتا وتەدى، ياعني 42,2 شاقىرىم، 21,1 شاقىرىم، 10 شاقىرىم، سونداي-اق ەستافەتالىق جۇگىرۋلەر ەسكەرىلىپ وتىر.