جوعارعى باس قولباسشىسىنىڭ جۇلدەسى ءۇشىن اسكەري-پاتريوتتىق اندەر بايقاۋى باستالادى

استانا. قازاقپارات - قازاقستاندا ق ر ق ك جوعارعى باس قولباسشىسىنىڭ جۇلدەسى ءۇشىن تۇڭعىش رەسپۋبليكالىق اسكەري-پاتريوتتىق اندەر بايقاۋى باستالادى.

بۇل تۋرالى ق ر قورعانىس مينيسترلىگىنىڭ باسپا ءسوز قىزمەتىنەن حابارلادى.

بايقاۋدىڭ نەگىزگى ماقساتى قازاقستاندىق اۆتورلار مەن كومپوزيتورلاردىڭ اسكەري-پاتريوتتىق اندەرىن ناسيحاتتاۋ، ق ر قارۋلى كۇشتەرى تۋرالى اسكەري-پاتريوتتىق اندەردىڭ سانىن ۇلعايتىپ، ساپاسىن ارتتىرۋ بولىپ تابىلادى.

اتالمىش جوبا كومپوزيتورلار جانە جازۋشىلار وداعىمەن بىرلەسە كاسىبي دەڭگەيدە وتكىزىلەتىنىمەن ەرەكشەلەنەدى.

ءادىلقازىلار القاسىنىڭ قۇرامىنا ق ر قورعانىس ءمينيسترىنىڭ بۇيرىعىمەن بەكىتىلگەن قورعانىس مينيسترلىگىنىڭ، جازۋشىلار وداعىنىڭ، كومپوزيتورلار وداعىنىڭ وكىلدەرى كىرەدى.

بايقاۋدا جوعارى ورىنداۋشىلىق شەبەرلىگىنە، جانرلىق ەرەكشەلىكتەرگە، ساپالى دەڭگەيگە جانە تاقىرىپ تاڭداۋداعى وزگەشەلىككە، اۆتوردىڭ شىعارماشىلىق شەبەرلىگىنە باعا بەرىلەدى.

بايقاۋ «وتان قورعاۋشىنىڭ وڭ بەينەسىن ايشىقتاي تۇسەتىن ق ر ق ك تۋرالى يميدجدىك اندەر» جانە «ساپتىق پەن اسكەر تۇرلەرى جانە تەكتەرى بويىنشا اندەر» اتتى ەكى اتالىم بويىنشا ەكى جىلدا ءبىر رەت وتكىزىلەتىن بولادى.

شىعارماشىلىق سايىسقا سۋ جاڭا، وزگەشە، بۇدان بۇرىن ەش جەردە جاريالانباعان جانە ورىندالماعان تۋىندى ۇسىنعان اۆتورلار قاتىسا الادى.

العاشقى نوميناتسياداعى باس جۇلدە ق ر ق ك جوعارعى باس قولباسشىسىنىڭ جۇلدەسى، ەكىنشى اتالىمدا 1, 2, 3-ورىن جەڭىمپازدارىن ماراپاتتايدى. كونكۋرسقا قاتىسۋ ءۇشىن قۇجاتتاردى 2016-جىلعى 25- قازانعا دەيىن جولداۋ قاجەت.