قازاقستانداعى سپورتتىق قوزعالىس الەمدىك كەڭىستىكتە تانىمال - ارىستانبەك مۇحامەدي ۇلى

استانا. قازاقپارات - استانا مارافونىنىڭ الەمدىك اۋقىمدا تانىمالدىعى ارتىپ كەلەدى. بۇل تۋرالى بۇگىن ەلوردادا قايىرىمدىلىق ماقساتتاعى ءىرى حالىقارالىق استانا مارافونىندا مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى.

«كەشە ءوزىم كۋاگەر بولدىم، ياعني كوپتەگەن شەتەلدىكتەر استانا مارافونىنا قاتىسۋ ءۇشىن ەلىمىزگە كەلىپ جاتتى. بۇل ءوز كەزەگىندە وسى حالىقارالىق مارافوننىڭ الەمدىك اۋقىمدا تانىمالدىعى ارتقانىنىڭ دالەلى. سونىمەن قاتار وسى رەتتە قازاقستانداعى سپورتتىق قوزعالىس الەمدىك كەڭىستىكتە كورىنىپ وتىرعانىن سەنىممەن ايتۋعا بولادى. سوندىقتان بۇنداي ماڭىزدى شارالارعا ەلىمىزگە كەلەتىن مەيماندار سانى ارتىپ كەلەدى. جىل وتكەن سايىن «استانا مارافونىنىڭ» تانىمالدىعى وسە تۇسەتىندىگىنە سەنىمدىمىن»، - دەپ توقتالدى مينيستر.

بۇدان بۇرىن حابارلانعانداي، ەلورداداعى قايىرىمدىلىق ماقساتتاعى ءىرى حالىقارالىق استانا مارافونىندا ق ر پرەمەر-ءمينيسترى كارىم ءماسىموۆ 21,1 شاقىرىم قاشىقتىقتى باعىندىردى. سونىمەن قاتار بۇل قاشىقتىقتا مارافوننىڭ مارە سىزىعىنان ق ر مادەنيەت جانە سپورت ءمينيسترى ارىستانبەك مۇحامەدي ۇلى مەن اقپارات جانە كوممۋنيكاتسيالار ءمينيسترى داۋرەن ابايەۆ تا ءوتتى.

مارە سىزىعىنان وتكەننەن كەيىن ك. ءماسىموۆ پەن شاراعا قاتىسقان ءبىرقاتار مينيسترلەر جانە ريو وليمپياداسىنىڭ جەڭىمپازدارى مەن جۇلدەگەرلەرى ەستەلىك فوتوسۋرەتكە ءتۇستى.

ا. مۇحامەدي ۇلىنىڭ سوزىنە قاراعاندا، پرەمەر-مينيستر كارىم ءماسىموۆ كۇندەلىكتى تاڭعى ساعات 6 دا تۇرىپ، جۇگىرۋگە شىعادى.

«ءبىز سوڭعى ەكى ايدا قازاقستاننىڭ وڭىرلەرىن ارالاعان كەزدە ۇكىمەت باسشىسى كۇندە تاڭەرتەڭ جۇگىرۋگە شىعىپ ءجۇردى. مەن ءوز باسىم كەشكە قاراي جۇگىرەمىن. جالپى، بۇگىنگى جۇگىرىپ وتكەن 21,1 شاقىرىمدى جاقسى قاشىقتىق دەپ ەسەپتەيمىن»، - دەدى مينيستر.

اۆتور: رۋسلان عابباسوۆ