استانا مارافونى: قازاقستانداعى جاس سپورتشىلاردان جاقسى ناتيجەلەر كۇتۋگە بولادى - بولات ءجۇمادىلوۆ

استانا. قازاقپارات - ەلىمىزدە سپورتقا وسىنداي قارقىنمەن كوڭىل ءبولىپ تۇرسا، جاس بۋىننان جاقسى ناتيجەلەر كۇتۋگە بولادى.

بۇل تۋرالى بۇگىن ەلوردادا قايىرىمدىلىق ماقساتتاعى ءىرى حالىقارالىق استانا مارافونىنا قاتىسقان وليمپيادا ويىندارىنىڭ ەكى دۇركىن كۇمىس جۇلدەگەرى (1996, 2000) بولات ءجۇمادىلوۆ ءمالىم ەتتى.

«بۇگىنگى شاراعا وتە قۋانىشتىمىن. مارافونعا قالا تۇرعىندارى، شەتەلدىك مەيماندار، ۇكىمەت باسشىسى مەن مينيسترلەر، سپورتشىلار قاتىسقانىن كوردىم. اتاپ ايتقاندا، ەلىمىزدە سپورتقا وسىنداي قارقىنمەن كوڭىل ءبولىپ تۇرسا، جاس بۋىننان بۇدان ارى قاراي جاقسى ناتيجەلەر كۇتۋگە بولادى دەپ سەنەمىن. تىعىز ۋاقىتتارىن ءبولىپ كەلگەندەرى ءۇشىن پرەمەر-مينيستر كارىم ماسىموۆكە، ق ر مادەنيەت جانە سپورت ءمينيسترى ارىستانبەك مۇحامەدي ۇلىنا ريزا بولىپ وتىرمىن. ولار سوڭىنا دەيىن ءبىر قارقىنمەن 21,1 شاقىرىمدى باعىندىردى»، - دەدى سپورتشى.

مارافون قاشىقتىعى استاناداعى ەسىل، الماتى جانە سارىارقا اۋداندارىن قامتىپ وتىر. وسى رەتتە سپورتتىق شارا بىرنەشە ساناتتا وتەدى، ياعني 42,2 شاقىرىم، 21,1 شاقىرىم، 10 شاقىرىم قاشىقتىقتا جۇگىرۋلەر ەسكەرىلگەن.