ىستىقكولدە كوشپەندىلەردىڭ بۇكىل الەمدىك ەكىنشى ويىندارى اشىلدى - كەسكىن
كوشپەندىلەر وركەنيەتى بۇگىندە كۇللى ادامزات بالاسى ۇزدىك ۇلگى رەتىندە كەرەك ەتىپ وتىرعان تۇراقتى دامۋدىڭ باستاپقى قالپى بولىپ تابىلادى. بۇل تۋرالى وسىندا وتكەن كوشپەندىلەردىڭ بۇكىل الەمدىك ەكىنشى ويىندارىنىڭ اشىلۋ بارىسىندا ءسوز سويلەگەن قىرعىزستان پرەزيدەنتى المازبەك اتامبايەۆ ايتتى. ونىڭ ايتۋىنشا، ب ۇ ۇ- نىڭ دامۋداعى باستى ماقساتى وسىعان باعىتتالعان.
پرەزيدەنت ءوز سوزىندە ويىندارعا قاتىسۋشىلار مەن قوناقتاردى وسىناۋ وراسان زور وردالى وقيعامەن قۇتتىقتادى. ول ەلدىڭ ءبىر مەزگىلدە 62 مەملەكەتتىڭ 1 مىڭ ادامعا جۋىق سپورتشىدان تۇراتىن ۇلكەن دەلەگاتسياسىن قابىلداۋعا قاۋقارلى بولىپ وتىرعانىنا ماقتانىش سەزىمىن ءبىلدىردى.
ا. اتامبايەۆتىڭ سوزىنە قاراعاندا، فەستيۆالگە سونداي-اق قىرعىزستاننىڭ ءاربىر وبلىسىنان وكىلدەر كەلگەن. «قىرعىزدار قوناقتى قۇتتى ادام دەپ سانايدى. ۇيگە قانشا قوناق كەلسە، سونشا قۇت تا كىرەدى، دەيدى ولار. سوندىقتان قىرعىزدار قاشاننان قوناقتاردى قۇرمەتپەن جانە مەيماندوستىقپەن قارسى الادى. ءدال بۇگىنگى سياقتى»، - دەدى ول.
قىرعىز ەلى پرەزيدەنتىنىڭ پىكىرىنشە، كوشپەندىلەر ويىندارىنا قىزىعۋشىلىق بىلدىرەتىن ەلدەردىڭ قاتارى ۇدايى ارتىپ كەلەدى. بۇدان نەبارى 2 جىل بۇرىن عانا وتكەن ءبىرىنشى ويىندارعا 19 ەلدىڭ وكىلى كەلگەن بولسا، قازىر بۇل سيفر 62 گە جەتىپ وتىر. بۇدان ارتىق قانداي دالەل كەرەك!
ا. اتامبايەۆ ءوزىنىڭ سوزىندە كوشپەندىلەردىڭ بۇكىل الەمدىك ەكىنشى ويىندارىن وتكىزۋگە قولداۋ كورسەتكەن ءبىرقاتار ەلدەردىڭ پرەزيدەنتتەرىنە العىس ايتتى.
قىرعىزستان پرەزيدەنتى سوڭىندا ويىنداردى اشىق دەپ جاريالادى.
