استانا مارافونىنا وليمپيادا چەمپيوندارى قاتىسۋدا

استانا. قازاقپارات - بۇگىن ەلوردادا قايىرىمدىلىق ماقساتتاعى ءىرى حالىقارالىق استانا مارافونىنا وليمپيادا چەمپيوندارى سەرىك ساپيەۆ پەن دانيار ەلەۋسىنوۆ قاتىسۋدا.

بۇدان بۇرىن حابارلانعانداي، بۇگىنگى شاراعا ق ر پرەمەر-ءمينيسترى كارىم ءماسىموۆ، ق ر پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ، ۇكىمەت مۇشەلەرى، ءبىرقاتار وتاندىق جانە حالىقارالىق كومپانيالاردىڭ وكىلدەرى، ەل تۇرعىندارى، قازاقستاندا تىركەلگەن ەلشىلىكتەردىڭ قىزمەتكەرلەرى، سونداي-اق الىس جانە جاقىن 25 شەتەلدىڭ اتلەتتەرى مارافون قاشىقتىعىن جۇگىرىپ وتپەك. اتاپ ايتقاندا، قازىرگى كەزدە ايتۋلى سپورتتىق جارىسقا ا ق ش، برازيليا، گەرمانيا، ۇلى بريتانيا، مالايزيا، اۆستراليا، بەلگيا، يران، رەسەي، تۇركيا، گرەكيا، جاپونيا، قىتاي، فرانسيا، پولشا جانە باسقا دا ەلدەردىڭ ازاماتتارى كەلدى.

مارافون قاشىقتىعى استاناداعى ەسىل، الماتى جانە سارىارقا اۋداندارىن قامتىپ وتىر. وسى رەتتە سپورتتىق شارا بىرنەشە ساناتتا وتەدى، ياعني 42,2 شاقىرىم، 21,1 شاقىرىم، 10 شاقىرىم قاشىقتىقتا جۇگىرۋلەر ەسكەرىلىپ وتىر.