قازاقستان- وزبەكستان قارىم- قاتىناسى ستراتەگيالىق سەرىكتەستىك دەڭگەيىندە جالعاسا بەرەدى - ساراپشى پىكىرى
«مەنىڭشە، قازاقستان مەن وزبەكستان اراسىنداعى ساياسي بايلانىستاردان ايتا قويارلىقتاي وزگەرىستەر كۇتۋدىڭ قاجەتى جوق. ويتكەنى، وزبەكستان پرەزيدەنتى يسلام كاريموۆ ەل تاۋەلسىزدىگىنىڭ 25 جىلدىعىنا وراي ءوز حالقىنا قۇتتىقتاۋىن 1 - قىركۇيەكتە جاريالاندى. ماعان ول ەلدىڭ 25 جىلدا ءجۇرىپ وتكەن جولىن قورىتىندىلاۋ جانە بولاشاققا جاسالعان ۇندەۋ سياقتى كورىندى. ءدال وسى قۇتتىقتاۋدا وزبەكستان باسقا ەلدەردىڭ ىشكى ىسىنە ارالاسپاۋ، وزگە ەلدەردىڭ ەگەمەندىگىن قۇرمەتتەۋ، وزگە ەلدىڭ اۋماعىندا اسكەري بازا ۇستاماۋ، باسقا ەلدەرگە وزبەك ەلىنىڭ قارۋلى كۇشتەرىن جىبەرمەۋ ساياساتىن ۇستاناتىندىعى ايتىلعان. دەمەك، وزبەكستاننىڭ جالپى ورتالىق ازياعا قاتىستى ۇستانىپ وتىرعان ساياساتىندا، جاقىن ارادا قانداي دا ءبىر وزگەرىس بولا قويمايدى. قازاقستان مەن وزبەكستان اراسىنداعى قارىم- قاتىناس تا ستراتەگيالىق سەرىكتەستىك دەڭگەيىندە جالعاسا بەرەدى»، - دەدى ساراپشى.
ج. سارابەكوۆ وزبەكستاننىڭ كەلەسى پرەزيدەنتى ەڭ الدىمەن ىشكى ماسەلەلەردى شەشۋگە دەن قوياتىندىعىن اتاپ ءوتىپ، ي. كاريموۆتىڭ مۇراگەرى كىم بولۋى مۇمكىندىگىنە قاتىستى ءوز جورامالىمەن دە ءبولىستى.
«قازىر ەكى ادامنىڭ ەسىمى اتالۋدا. ونىڭ ءبىرى - وزبەكستان رەسپۋبليكاسىنىڭ پرەمەر- ءمينيسترى ش. ميرزييەۆ، ال ەكىنشىسى - ۆيتسە- پرەمەر ءارى قارجى ءمينيسترى ر. ازيموۆ. قازىرگى ۋاقىتتا ساراپشىلار اراسىندا دا، اقپاراتتىق كەڭىستىكتە تە شاۆحات ميرزيەيەۆتىڭ مۇمكىنشىلىگى مول دەگەن پىكىر قالىپتاسقان جانە مۇنىمەن كەلىسۋگە بولادى. سەبەبى، يسلام كاريموۆتى جەرلەۋ ءراسىمىن ۇيىمداستىرۋ جونىندەگى مەملەكەتتىك كوميسسيانى كىم باسقارسا، سونى ادەتتە كەلەسى پرەزيدەنت رەتىندە كورۋگە بولادى. بۇل رەتتە ىشكى ەليتا اراسىندا ءوزارا كەلىسىمنىڭ بولاتىنى انىق. ال جەرلەۋ ءراسىمىن ۇيىمداستىرۋدى شاۆحات ميرزييەۆ باسقاراتىندىعى بەلگىلى. دەمەك، بۇل جايت ونىڭ ىشكى ەليتامەن بەلگىلى ءبىر كەلىسىمگە قول جەتكىزگەندىگىن بايقاتادى. بۇل فاكت كەلەسى پرەزيدەنت ش. ميرزييەۆ بولادى دەگەن تۇجىرىمدى كۇشەيتە تۇسەدى»، - دەدى ج. سارابەكوۆ.
اۆتور: مارلان جيەمباي
