14:51, 03 - قىركۇيەك 2016 | GMT +5
يسلام كاريموۆتىڭ ءمايىتى سامارقاندقا جەتكىزىلدى
استانا. قازاقپارات - يسلام كاريموۆتىڭ ءمايىتى سامارقاندقا جەتكىزىلدى. تاشكەنتتەگى سياقتى مۇندا دا وزبەكستاننىڭ تۇڭعىش پرەزيدەنتىمەن قوشتاسۋ ءۇشىن كوشەگە مىڭداعان ادام شىققان.
مارقۇم اتا- اناسى جاتقان تۋعان قالاسىنداعى شاحي- زيندا تاريحي قورىمىنا جەرلەنەدى. مۇندا 20 جىلدان بەرى ادام جەرلەنبەيدى، ءبىراق بۇل جولى وزبەكستاننىڭ تۇڭعىش پرەزيدەنتى ءۇشىن رۇقسات بەرىلگەن.
قارالى جيىنعا 17 ەلدىڭ دەلەگاتسياسى قاتىسادى. قازاقستان اتىنان ەلباسى نۇرسۇلتان نازاربايەۆتىڭ تاپسىرماسى بويىنشا پرەمەر- مينيستر كارىم ءماسىموۆ باستاعان دەلەگاتسيا باردى. وزبەكستان پرەزيدەنتىنىڭ مىندەتىن اتقارۋ پارلامەنت سەناتىنىڭ ءتوراعاسى نيگماتيللا يۋلداشيەۆقا جۇكتەلگەن. سامارقاند ورتالىعى كولىك قوزعالىسى ءۇشىن جابىق، تەك جاياۋ جۇرۋگە رۇقسات بار. ءار كوشەنىڭ بۇرىشىندا ساقشىلار قوعامدىق ءتارتىپتى باقىلاپ تۇر.
www.24.kz
