الەم ەلدەرى باسشىلارى كاريموۆتىڭ قازاسىنا بايلانىستى كوڭىل ايتتى

ا ق ش پرەزيدەنتى باراك وباما «قازىرگىدەي كۇردەلى ۋاقىتتا قۇراما شتاتتار وزبەكستان حالقىنا قولداۋ بىلدىرەتىنىن» ايتقان.
«وزبەكستان ءوز تاريحىنىڭ جاڭا تاراۋىن باستاپ وتىرعان بۇگىنگى كەزدە ا ق ش وزبەكستانمەن ارىپتەستىك قارىم- قاتىناسىنا، ونىڭ ەگەمەندىگىنە، قاۋىپسىزدىگىنە جانە بارلىق ازاماتتارىنىڭ قۇقىقتارىن ساقتاۋعا نەگىزدەلگەن بولاشاعىنا قاتىستى ۇستانىمىنا بەرىك بولىپ قالادى» دەلىنگەن اق ءۇي باسشىسىنىڭ مالىمدەمەسىندە.
قىتاي پرەزيدەنتى شي جينپيڭ ءوزىنىڭ جەدەلحاتىندا كاريموۆتىڭ قازاسىنا بايلانىستى وزبەكستان حالقىنا كوڭىل ايتىپ، «قىتاي وزبەكستانمەن جان- جاقتى ستراتەگيالىق ارىپتەستىكتى جوعارى باعالايتىنىن» جانە «ەكىجاقتى قارىم- قاتىناستى ودان ارى تەرەڭدەتە بەرۋگە نيەتتى ەكەنىن» بىلدىرگەن.
قازاقستان پرەزيدەنتى نۇرسۇلتان نازاربايەۆ كوڭىل ايتۋ جەدەلحاتىندا «قازاقستاندىقتار بۇل مەزگىلسىز ءارى ورنى تولماس قازانىڭ اۋىرتپالىعىن باۋىرلاس وزبەكستان حالقىمەن بىرگە بولىسەدى. 30 جىلداي قاناتتاسا جۇمىس ىستەگەن دوسىمنان ايرىلعانىما قايعىرامىن» دەگەن.
رەسەي پرەزيدەنتى ۆلاديمير پۋتين كاريموۆتىڭ قازاسىن «وزبەكستان حالقى جانە بۇكىل ت م د مەن شاڭحاي ىنتىماقتاستىعى ۇيىمى بويىنشا سەرىكتەس ەلدەر ءۇشىن وتە اۋىر قازا» دەپ اتاعان.
قىرعىزستان پرەزيدەنتى المازبەك اتامبايەۆ كورشى ەلدىڭ باسشىسىنىڭ قازاسىنا بايلانىستى وزبەكستان حالقى مەن مارقۇمنىڭ تۋىستارىنا كوڭىل ايتىپ، يسلام كاريموۆكە «قىرعىز- وزبەك ەكىجاقتى ىنتىماقتاستىعىن ورناتۋعا جانە دامىتۋعا زور ۇلەس قوسقان مەملەكەتتىك قايراتكەر» رەتىندە باعا بەرگەن.
تاجىكستان پرەزيدەنتى ەمومالي راحمون كوڭىل ايتۋ جەدەلحاتىندا «يسلام كاريموۆتىڭ ورنى تولماس مەزگىلسىز قازاسى تۋرالى حاباردى تاجىكستاندا قاتتى قايعىرىپ قابىلداعانىن» ايتقان.
سونىمەن بىرگە ازەربايجان، بەلارۋس، گرۋزيا، لاۆتيا، مولدوۆا، ۋكراينا پرەزيدەنتتەرى، ب ۇ ۇ باس حاتشىسى دا وزبەكستان پرەزيدەنتى يسلام كاريموۆتىڭ قازاسىنا بايلانىستى رەسمي تاشكەنت پەن وزبەكستان حالقىنا كوڭىل ايتىپ، جەدەلحاتتار جولداعان.
كەشە كەشكىسىن وزبەكستان ۇكىمەتى ينسۋلت الىپ اۋرۋحانادا جاتقان ەل پرەزيدەنتى يسلام كاريموۆتىڭ 2 - قىركۇيەك كۇنى جەرگىلىكتى ۋاقىت بويىنشا ساعات 20.15-تە قايتىس بولعانىن رەسمي تۇردە حابارلاعان.
وزبەكستاندى سوڭعى 27 جىل بويى باسقارعان كاريموۆ 3 - قىركۇيەكتە سامارقاندا جەرلەنبەك.
https://www.azattyq.org