مۇناي ەكسپورتتاۋشى ەلدەر مۇناي ءوندىرۋدى شەكتەۋ ماسەلەسى بويىنشا ورتاق شەشىم شىعارادى

ابۋ- دابي. قازاقپارات - بەيسەنبى كۇنى ساۋد ارابياسى مۇناي ءوندىرۋ بويىنشا مۇناي ەكسپورتتاۋشى ەلدەر ۇيىمى ورتاق شەشىم قابىلدايتىنى تۋرالى مالىمدەمەسىنەن كەيىن مۇناي باعاسى تۇراقتاندى.

Brent ماركالى مۇنايىنىڭ قاراشا ايىنا جەتكىزۋ فيۋچەرستەرىنىڭ قۇنى باررەلىنە 46,89 ا ق ش دوللارىن قۇرادى. الدىڭعى سەسسيادا 1,65 ا ق ش دوللارىنا ارزانداعان ا ق ش- قا مۇناي جەتكىزۋ فيۋچەرستەرىنىڭ قۇنى 5 سەنتكە قىمباتتاپ، 44,75 دوللاردى قۇرادى.

ساۋد ارابياسى سىرتقى ىستەر ءمينيسترى ادەل ال- دجۋبەير و پ ە ك- كە مۇشە ەلدەر مەن اتالعان ۇيىمعا كىرمەگەن مەملەكەتتەر ورتاق پوزيتسيا شىعارۋعا باعىت العانىن مالىمدەدى.

مۇناي ەكسپورتتاۋشى ەلدەر ۇيىمىنىڭ مۇشەلەرى 26-28 قىركۇيەك كۇنى الجيردە وتەتىن حالىقارالىق ەنەرگەتيكالىق فورۋم اياسىندا كەزدەسەدى جانە قارا التىنعا باعا بەلگىلەۋدى جانداندىرۋعا كۇش سالادى دەپ بولجانۋدا.

«ەگەر بىزگە ناتيجە قاجەت بولسا، بارلىعى جاۋاپكەرشىلىكتى قولعا الۋى ءتيىس جانە سوڭعى بەس- التى ايدا مۇنىڭ ءبارى ۇجىمدىق كۇش ەكەنىن ۇعىندى دەگەن ويدامىن»، - دەدى مينيستر.

وسى اپتادا يراك پرەمەر- ءمينيسترى حايدەر ال- ابادي كولەمى جاعىنان ساۋد ارابياسىنان كەيىنگى ەكىنشى و پ ە ك مۇناي ءوندىرۋشىسى رەتىندە قارا التىننىڭ باعاسىن تۇراقتى ۇستاپ تۇرۋ ءۇشىن مۇناي ءوندىرىسىن توقتاتۋ تۋرالى شەشىمدى قولدايتىنىن ايتتى. الايدا، ەلدەگى مۇناي ءمينيسترى يراكتىڭ مۇناي ءوندىرىسىن ۇلعايتۋدى قالايتىنىن جەتكىزدى.

 تەگەران مەن رەسەي و پ ە ك ەلدەرىنىڭ جانە كارتەلدەن تىس مەملەكەتتەردىڭ ءوندىرىستى تۇراقتاندىرۋ تۋرالى بۇل تالپىنىسىن قولدامادى جانە ءساۋىر ايىنداعى ءوندىرىستى توقتاتۋ تۋرالى كەلىسسوزدەر كۇشىن جويدى.