استانادا رەسپۋبليكالىق فيزيكا- ماتەماتيكا مەكتەبى اشىلدى
ايتا كەتكەن ءجون، بۇل مەكتەپتىڭ ءبىلىم بەرۋ جۇيەسىندە تەك فيزيكا جانە ماتەماتيكا پاندەرىنە عانا ەمەس، كومپيۋتەردى تەرەڭ يگەرۋگە دە ەرەكشە ەكپىن جاسالادى.
ەلىمىزدە العاش رەت فيزيكا- ماتەماتيكا مەكتەبى 1972 - جىلى الماتى قالاسىندا اشىلعان بولاتىن. مۇنداعى ءبىلىم بەرۋ جۇيەسى ماسكەۋ، نوۆوسىبىر، مينسك، نيۋ- يورك سىندى الەمنىڭ ءىرى شاھارلارىنداعى مەكتەپتەردىڭ وقۋ مودەلى بويىنشا قۇرىلعان. تانىمال عالىمدار مەن بەدەلدى ساياساتكەرلەردىڭ كوبى وسى ءبىلىم وردالارىن بىتىرگەن. ەندى ەلوردالىق بالالار دا وسى بەدەلدى مەكتەپ قابىرعاسىندا ءبىلىم الادى.
1 - قىركۇيەك كۇنى 900-گە گە جۋىق وقۋشىمەن بىرگە مەكتەپكە ەل پرەمەر- ءمينيسترى كارىم ءماسىموۆ تە كەلدى. ۇكىمەت باسشىسى جاڭا ءبىلىم ورداسىنىڭ وقۋ باعدارلاماسىمەن تانىسىپ، عيماراتتىڭ قالاي جابدىقتالعانىن كوردى.
عابيت بەكاحمەتوۆ استانا ق. رەسپۋبليكالىق فيزيكا- ماتەماتيكالىق مەكتەبىنىڭ ديرەكتورى:
- ءبىز وسى مەكتەپتى اشۋ تۋرالى شەشىمدى ەكى- اق اي بۇرىن قابىلدادىق. وسى مەرزىم ىشىندە 2 مىڭعا جۋىق ءوتىنىش ءتۇستى. كونكۋرس نەگىزىندە 900-گە تارتا بالا وسىندا وقيتىن بولدى. مەكتەپتە اقىلى جانە اقىسىز بولىمدەر بار. ساباق بەرەتىن مۇعالىمدەردىڭ ءبىلىمى وتە جوعارى. ءبىز ىرىكتەۋ ناتيجەسىندە استانا، الماتى قالالارىنىڭ ەڭ مىقتى ۇستازدارىن وسىندا شاقىردىق.
مەكتەپ باسشىلىعى وسىندا جينالعان ۇزدىك ۇستازدارعا زور سەنىم ارتادى. سەبەبى مۇعالىمنىڭ ەڭبەگى بولاشاقتا وقۋشىلاردىڭ بىلىكتى مامان بولىپ قالىپتاسۋىنا سەپ. ايتا كەتكەن ءجون، كەزىندە الماتىداعى فيزيكا- ماتەماتيكا مەكتەبىن بىتىرگەن پرەمەر مينيستر Twitter الەۋمەتتىك جەلىسىندە ءوزىنىڭ العاشقى ۇستازىن ەسكە الىپ، بۇكىل حالىقتى بۇل تۇلعالاردىڭ ەڭبەگىن ۇمىتپاي، مەكتەپتەگى ەستەلىكتەرمەن بولىسۋگە شاقىرعان. بۇگىن فيزيكا- ماتەماتيكا مەكتەبىمەن قاتار تاعى بىرنەشە ءبىلىم بەرۋ مەكەمەسى مەن جاڭا بالاباقشالار دا ءوز ەسىكتەرىن ايقارا اشتى.
www.24.kz
