قازاقستان مەن ق ح ر ەكونوميكالىق باعدارلامالارىن ۇشتاستىرۋ جوسپارىنا قول قويىلدى

 استانا. قازاقپارات - ەلباسى نۇرسۇلتان نازاربايەۆتىڭ قىتاي حالىق رەسپۋبليكاسىنا جۇمىس ساپارى اياسىندا ق ر ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى «نۇرلى جول» جاڭا ەكونوميكالىق ساياساتىن جانە «جىبەك جولىنىڭ ەكونوميكالىق بەلدەۋىن» ۇشتاستىرۋ جونىندەگى ىنتىماقتاستىق جوسپارىنا قول قويدى.

بۇل تۋرالى ق ر ۇلتتىق ەكونوميكا مينيسترلىگىنىڭ باسپا ءسوز قىزمەتىنەن حابارلادى.

 قۇجاتتى قازاقستان تاراپىنان ۇلتتىق ەكونوميكا ءمينيسترى قۋاندىق بيشىمبايەۆ، قىتاي تاراپىنان ق ح ر دامۋ جانە رەفورمالار جونىندەگى مەملەكەتتىك كوميتەتىنىڭ ءتوراعاسى سيۋي شاوشي راسىمدەگەن.

«قازاقستاننىڭ قىتايمەن ىنتىماقتاستىعىنىڭ ستراتەگيالىق سيپاتىن جانە وسى ەلدىڭ ينۆەستيتسيالىق الەۋەتىن ەسكەرە وتىرىپ، جوسپاردى ىسكە اسىرۋ ەكى ەل اراسىنداعى ساۋدا- ەكونوميكالىق ىنتىماقتاستىقتى بەلسەندەندىرۋگە جانە كەڭەيتۋگە مۇمكىندىك بەرەدى. اتالعان قۇجات ينفراقۇرىلىم، ينۆەستيتسيالار جانە ساۋدا، ونەركاسىپ، كولىك جانە تۋريزم سالالارىنداعى ەكىجاقتى ىنتىماقتاستىقتىڭ ايتارلىقتاي كەڭەيۋىن بولجامدايدى. تاراپتار اۆتوجولدار سالۋعا جانە قازاقستان اۋماعىنداعى اۆتوجول ينفراقۇرىلىمىن جاڭعىرتۋعا، سونداي- اق قىتاي حالىق رەسپۋبليكاسى- ەۋروپا جانە كەرى باعدار بويىنشا تەمىرجول ماگيسترالىن سالۋ مەن جاڭعىرتۋعا كاسىپورىنداردىڭ قاتىسۋىن بەلسەندى تۇردە كوتەرمەلەۋگە نيەتتەنەدى. ودان باسقا، قۇجات ەكى ەلدىڭ اۋماعىندا، سول سياقتى ءۇشىنشى ەلدەردە لوگيستيكالىق تەرمينالدارىن دامىتۋدا كاسىپورىندارعا قولداۋ كورسەتۋدى بولجامدايدى، ءۇشىنشى ەلدەر قازاقستان مەن قىتايدىڭ ەكسپورتتىق- يمپورتتىق الەۋەتىن ۇلعايتۋعا ىقپال ەتەتىن بولادى»، - دەلىنگەن حابارلامادا.

قول قويىلعان جوسپار اياسىندا قازاقستان مەن قىتاي يندۋستريانىڭ جاڭا بۋىن بيوتەحنولوگياسى، ەنەرگيانىڭ جاڭا كوزدەرى جانە جاڭا ماتەريالدار سياقتى سالالارىنداعى ىنتىماقتاستىقتى نىعايتۋعا نيەتتى. ەلدەر ينجينيرينگ تەحنيكاسى مەن اۆتوموبيل ونەركاسىبىن ءوندىرۋ سالاسىنداعى ىنتىماقتاستىق اۋقىمىن كەڭەيتۋدى جوسپارلاپ وتىر.

سونداي- اق، قۇجات تۋريزم جانە كوممۋنالدىق شارۋاشىلىق پەن سۋمەن جابدىقتاۋ جۇيەلەرى سالاسىنداعى ينفراقۇرىلىمدى سالۋ اياسىنداعى ىنتىماقتاستىقتى نىعايتۋعا باعىتتالعان. قىتاي تاراپى قازاقستاننىڭ قالالىق جىلۋ جانە سۋمەن جابدىقتاۋ جەلىسىن قايتا قۇرۋدى جانە جاڭعىرتۋدى قولدايدى.

جالپى، ەڭ الدىمەن، مەملەكەت جانە ۇكىمەت باسشىلارىنىڭ تۇراقتى كەزدەسۋلەرى ارقىلى، سونداي- اق «جىبەك جولىنىڭ ەكونوميكالىق بەلدەۋى» باستاماسىنىڭ شەڭبەرىندەگى قازاقستان مەن قىتايدىڭ بىرلەسكەن جوبالارى بويىنشا جۇمىستىڭ باستالۋىنا بايلانىستى، قازاقستان مەن قىتاي اراسىنداعى ەكىجاقتى قارىم- قاتىناستىڭ جاندانا تۇسكەنىن اتاپ وتكەن ءجون.

 اۆتور: مارلان جيەمباي