قازاقستان ەلەكتروندىق ساۋدانى دامىتۋعا نيەتتى - ب. ساعىنتايەۆ

حاڭجوۋ. قازاقپارات - ەلەكتروندىق ساۋدا سالاسى قازاقستان ەكونوميكاسىنىڭ ناقتى سەكتورلارىن دامىتۋدىڭ ماڭىزدى سالالارىنىڭ ءبىرى بولىپ تابىلادى، دەپ مالىمدەدى ق ر پرەمەر- ءمينيسترىنىڭ ءبىرىنشى ورىنباسارى باقىتجان ساعىنتايەۆ ق ح ر جىجياڭ پروۆينسياسىنىڭ حاڭجوۋ قالاسىنداعى «JUMORE E-commerce Co., Ltd»  باسقارماسىنىڭ ءتوراعاسى لۋ حۋنسيانمەن كەزدەسۋ بارىسىندا.

 «ساراپشىلاردىڭ باعالاۋىنشا، قازاقستان ەۋرازيالىق ەكونوميكالىق وداق ەلدەرى ءۇشىن لوگيستيكا جانە ەلەكتروندىق كوممەرتسيا ورتالىعىنا اينالىپ، ە- كوممەرتسيا ۇلەسىن جالپى الەمدىك كورسەتكىشكە ياعني، ەلدەگى بولشەك ساۋدانىڭ جالپى كولەمىنىڭ 4 پايىزىنا جەتكىزە الادى. بۇل ءۇشىن لوگيستيكا تاسىلدەرىن قايتا قاراپ، تاۋارلار جەتكىزۋ جەلىسىن دامىتىپ، بانك قىزمەتتەر سپەكترىن كەڭەيتۋ قاجەت»، - دەدى ول.

ب. ساعىنتايەۆ قازاقستان بىرنەشە جىل بويى يندۋستريالدىق- يننوۆاتسيالىق دامۋ جوسپارىن ىسكە اسىرىپ كەلە جاتقانىن اتاپ ءوتتى.

 ونىڭ ايتۋىنشا، ە- كوممەرتسيانى دامىتۋداعى قىتاي تاجىريبەسى قازاقستاننىڭ قىزىعۋشىلىعىن تۋدىرۋدا. بۇل رەتتە قىتاي تاراپى «ينتەرنەت+» باعدارلاماسىن ىسكە اسىرۋ اياسىندا قازاقستانمەن ىنتىماقتاستىقتى رەتتەۋگە، ينتەرنەت- ساۋدا، ينتەرنەت- يندۋستريا، جاڭا ساندىق تەحنولوگيالار، جەلىلىك بازالار سالاسىندا ىنتىماقتاستىقتىڭ جاڭا تەتىكتەرىن وڭدەۋگە ءازىر ەكەنىن ءبىلدىردى.