سامارقاندا قاۋىپسىزدىك شارالارى كۇشەيتىلىپ، قوزعالىس شەكتەلدى

استانا. قازاقپارات - سامارقاندا قاۋىپسىزدىك شارالارى كۇشەيتىلىپ، قالانىڭ ورتالىق بولىگىندە ءبىرقاتار جولدار جابىلدى، سونداي- اق، كەيبىر نىسانداردا جوندەۋ جۇمىستارى جۇرگىزىلۋدە.

 دەرەككوزدىڭ حابارلاۋىنشا، قالادا قۇقىق قورعاۋ ورگاندارىنىڭ سانى ەداۋىر ارتقان. ورتالىقتا قوزعالىس شەكتەلدى. سونداي- اق، قازىرگى ۋاقىتتا شاحي زيندا كەشەنىندە بەلسەندى قۇرىلىس جۇمىستارى جۇرگىزىلىپ جاتقاندىعى بەلگىلى.

بۇدان بولەك جۇما كۇنى تاشكەنت- سامارقان باعىتىنداعى «افروسياب» جۇردەك پويىزىنىڭ قوزعالىسى توقتاتىلعان. ال تۇندە سامارقان ماڭىنان اۋەجايعا قاراي ءۇش ۇشاق ۇشقان. وزبەكستان پرەزيدەنتى يسلام كاريموۆ سامارقان تۋماسى. دەرەككوزدىڭ سوزىنە قاراعاندا، كوپشىلىك وزبەكستاندىق ۇلتتىق تەلەديدار ارقىلى حابارلاردى باقىلاپ وتىر. بارلىعى جۇما نامازىنان كەيىن ەل پرەزيدەنتىنىڭ دەنساۋلىق جاعدايى تۋرالى رەسمي حابارلاما جاسالادى دەپ كۇتۋدە.

بۇعان دەيىن وزبەكستاننىڭ بۇقارالىق اقپارات قۇرالدارىندا وزبەك باسشىسىنىڭ قايتىس بولعانى تۋرالى اقپاراتتار ەكىنشى رەت قايتارا جاريالانىپ، ءتىپتى جەرلەۋ راسىمىنە دايىندىق بارىسىنان سۋرەتتەر دە جاريالانعان بولاتىن.

 ەستەرىڭىزگە سالا كەتەيىك، 78 جاستاعى وزبەكستان پرەزيدەنتى يسلام كارىموۆتىڭ ميىنا قان قۇيىلىپ، اۋرۋحاناعا تۇسكەن بولاتىن. كۇنى كەشە ب ا ق- تاردا ونىڭ مەزگىلسىز قايتىس بولعانى تۋرالى اقپارات تارادى. پرەزيدەنتتىڭ تۋىستارى مۇنى تەرىسكە شىعارعانىمەن، وزبەكستانداعى «فەرعانا» باسىلىمىنىڭ رەداكتورى جازىلعان اقپاراتتى راستايتىن سەنىمدى دەرەككوزدەرى بار ەكەندىگىن ايتقان. سونداي- اق، اۋرۋحانادا جاتقان كارىموۆتى حالىققا كورسەتۋدى تالاپ ەتكەن ەدى.

بۇعان دەيىن لولا كارىموۆا اكەسىن قولداعان وتانداستارىنا العىسىن ايتقان ەدى.

Stan.kz