17:22, 02 - قىركۇيەك 2016 | GMT +5
گەرمانيا اسكەرى سيريالىق بوسقىنداردى ءۇي تۇرعىزۋعا ۇيرەتۋدە
استانا. قازاقپارات - گەرمانيا اسكەرى سيريالىق بوسقىنداردى قۇرىلىس جۇرگىزۋگە ۇيرەتۋدە. ەلدىڭ قورعانىس ءمينيسترىنىڭ ايتۋىنشا، بۇل كاسىپ ولارعا بولاشاقتا سيريانى قايتا قالپىنا كەلتىرۋ ءۇشىن كەرەك بولادى. وسى اپتادا باستالعان كۋرس 12 اپتاعا سوزىلماق.
جالپى ءدارىس اياسىندا 120 ميگرانت ينجەنەرلىك جانە قۇرىلىس جۇمىسىنىڭ قىر- سىرىنا قانىعادى. نەمىس بيلىگى كەلىمسەكتەر كەلەشەكتە گەرمانيادا قالۋدى ۇيعارسا دا جاڭا بىلىكتىلىك ولاردىڭ قوعامنان ءوز ورنىن تابۋىنا سەپتىگىن تيگىزەدى دەپ ەسەپتەيدى.
ەستەرىڭىزگە سالا كەتەيىك، نەمىس ۇكىمەتى بىلتىر ءبىر ميلليوننان استام بوسقىندى قابىلداعان ەدى. بيىل ميگرانتتار 300 مىڭ ادامعا قىسقارعان.
ۋرسۋلا فون دەر ليايەن، گەرمانيا قورعانىس ءمينيسترى:
- مەن سيرياعا قايتقىسى كەلەتىن ءبىر بوسقىنمەن سويلەستىم. ءبىزدىڭ جوبامىز وعان ەلىن قالپىنا كەلتىرۋ ماقساتىن ىسكە اسىرۋعا مۇمكىندىك بەرەدى. سوندىقتان ءبىز بوسقىنداردى قۇرىلىس جۇرگىزۋگە ۇيرەتىپ جاتىرمىز. ونىڭ ۇستىنە، جاڭا كاسىپتىڭ ارقاسىندا ولار اقشا تابا الادى.
www.24.kz
