اقتوبەدەگى تەراكتىگە قاتىستى ىستە جاڭا دەرەكتەر پايدا بولدى

استانا. قازاقپارات - اسكەري تەرگەۋشىلەر اقتوبەدەگى اسكەري ءبولىمنىڭ قىزمەتكەرلەرىنە قاتىستى ءىس قوزعادى.

اتىشۋلى تەراكتىگە قاتىستى جاڭا دەرەكتەر ك ت ك تەلەارناسىنىڭ بەينەماتەريالىندا ايتىلادى.

وسى ىستەگى فيگۋرانتتاردىڭ ءبىرى سول كۇنى كەزەكشىلىك اتقارعان قايرات تاستانبەكوۆ ەكەنى انىقتالدى. ول ءۇش اي بويى ىسكە كۋاگەر رەتىندە تارتىلىپ، ويلاماعان جەردەن كۇدىكتىگە اينالعان. ول قازىرگى ۋاقىتتا بارلىق ينستانتسيالارعا شاعىم ءتۇسىرىپ جاتىر.

«5- ماۋسىمدا لاڭكەستەر باسىپ كىرگەندە وسى اسكەري بولىمدە قاندى وقيعا بولدى. وسىنداي توتەنشە جاعداي بولعاندىقتان، بارلىق ورگانگا - وبلىستىق ءى ءى د، ورالدا ورنالاسقان «باتىس» وڭىرلىك بولىمشەسىنە حابار بەرۋىمىز قاجەت بولاتىن. لاڭكەستەردىڭ قولاستىندا بولىپ، ولاردىڭ ايتقان شارتتارىن ورىندادىم»، - دەدى اسكەري قىزمەتكەر.

تەراكتىدەن كەيىن سول كۇنى كەزەكشىلىك ەتكەن بارلىق وفيتسەر، سونداي-اق، مايور تاستانبەكوۆ تە جاۋاپ الۋعا شاقىرىلدى. اسكەري بولىمشەنىڭ باسشىلىعى دا سول كەزدە تەز ارادا اۋىسىپ كەتكەن. تاستانبەكوۆ تە جۇمىستان ءوز ەركىمەن كەتىپ، تەرگەۋشىلەرگە بارىپ ءجۇردى. ال جاقىندا ول ءوزىنىڭ ويلاماعان جەردەن ايىپتالۋشىعا اينالىپ كەتۋى مۇمكىن ەكەنىن ءبىلدى.

«كەشەدەن باستاپ مەن وسى ىستە كۇدىكتىگە اينالدىم. ارى قاراي نە بولاتىنىن بىلمەيمىن. قازىر بۇلتارپاۋ شاراسى ارقىلى قاماۋعا الۋى دا مۇمكىن. مۇندا نە بولىپ جاتقانىن حالىق ءبىلسىن»، - دەدى تاستانبەكوۆ.

ال مايوردىڭ ايەلى كۇيەۋىنىڭ قاماۋعا الىنۋى مۇمكىن ەكەنىن ەستىگەندە ابدىراپ قالدى. «وقيعا ورنىندا بولعانداردىڭ بارلىعى جۇمىستان قۋىلدى. قازا تاۋىپ، جاراقات العاندار - ناعىز باتىرلار. مەنىڭ كۇيەۋىم كۇدىكتىگە اينالدى. ءبىر جىل ءبىر ايلىق بالامىز بار»، - دەدى مادينا تاستانبەكوۆا.

وفيتسەردىڭ وتباسى ەكىنشى ءسابيدى كۇتىپ وتىر.

ايتا كەتەيىك، اسكەري تەرگەۋشىلەر وسى ىسكە قاتىستى پىكىر بىلدىرمەي وتىر. ولار تەك تاستانبەكوۆتىڭ وسى ىستەگى فيگۋرانتتاردىڭ ءبىرى ەكەنىن راستادى. ول ق ر قىلمىستىق كودەكسىنىڭ 447-بابى بويىنشا («ىشكى قىزمەت اتقارۋدىڭ نەمەسە گارنيزوندا پاترۋل بولۋدىڭ جارعىلىق قاعيدالارىن بۇزۋ») كۇدىكتى دەپ تانىلىپ وتىر.