تۇركيادا قازاق ۇستالارى سوعاتىن قانجار، كەزدىكتەرگە سۇرانىس ەرەكشە
ءبىر پىشاققا تاپسىرىس بەرگەن ادام بەس اي كەزەگىن كۇتەدى، دەپ جازادى egemen.kz.
وسىدان 300 جىل بۇرىن الىپ وسمانلى يمپەرياسى اسكەرىنە قاجەتتى قىلىش پەن قانجار تاپشىلىعى ماسەلەسىن شەشۋ ءۇشىن چاناككالەنىڭ باباكالە اۋىلىنا قازاق جەرىنەن ۇستالار العىزعان ەكەن. باباكالەگە 1700-جىلدارى كەلگەن سول ۇستالاردىڭ قولىنان شىققان قانجار-قىلىشتار كەزىندە سيريا مەن مىسىرعا دەيىن تارالىپتى. ال تەمىردەن ءتۇيىن تۇيگەن ۇستالىق ونەردىڭ وزەگى ۇزىلمەي بۇگىنگە دەيىن جەتىپتى.
اتادان بالاعا ميراس بولىپ جالعاسقان وسى ءداستۇرلى ۇستالىق كاسىپتى تۇركيادا قازىر دوعان توسىن مەن ونىڭ نەمەرە اعاسى عانا جالعاستىرىپ كەلەدى. بۇگىندە «باباكالە پىشاقتارى» دەگەن اتاۋمەن ءماشھۇر بولعان پىشاقتاردى تۇركيادا وسى ەكى ۇستا عانا جاسايدى. دوعان توسىننىڭ ايتۋىنشا، العاش قازاق ۇستالارى كەلگەن كەزدە بۇل اۋىلدا 18 ۇستاحانا كورىگىن قىزدىرىپ تۇرعان. كەيىن وق-ءدارى مەن مىلتىق شىققان سوڭ بۇل ۇستالىق توقتاي باستاعان. تەك وزدەرىن سول ۇستالاردىڭ ۇرپاعى سانايتىن ەكى ۇستا بابالار كاسىبىن ۇزبەي، قانجار، كەزدىك، پىشاق جاساۋدى ءالى جالعاستىرىپ كەلەدى.
«بۇل ونەر وسى كۇنگە دەيىن اتادان بالاعا بەرىلۋ ارقىلى جەتتى. مەن دە قىلىش- قانجاردىڭ جالعاسى رەتىندە پىشاق پەن كەزدىك جاساۋمەن اينالىسامىن.
بۇل ونەردى مەنەن باسقا نەمەرە اعام دا كاسىپ قىلعان. ءبىز 300 جىل بويى جالعاسىپ كەلە جاتقان ءداستۇردى ۇزگەنىمىز جوق، جاسايتىن بۇيىمدارىمىزدا بابالار قولتاڭباسى سول كۇيى ساقتالعان دەي الامىن. پىشاق، كەزدىكتەرىمىزگە حالىقتىڭ قىزىعۋشىلىعى جوعارى. قازىر وسى ۇستالىق ونەردى ۇلىما ۇيرەتىپ ءجۇرمىن»، - دەيدى انادولى اقپارات اگەنتتىگىنە سۇحبات بەرگەن دوعان توسىن.
ونىڭ ايتۋىنشا، ۇستا جۇمىس بارىسىندا ءۇش عاسىرلىق بۇرعىلاردى قولدانادى. بۇل بۇرعىلار كەزىندە قىلىش پەن قانجاردىڭ ساپتارىن تەسۋ ءۇشىن پايدالانىلعان ەكەن. سونداي-اق پىشاقتاردىڭ سابى اعاشتان ەمەس، قويدىڭ، ەشكىنىڭ جانە كيىكتىڭ مۇيىزدەرىنەن جاسالادى. ال پىشاقتىڭ ءوزى بولاتتان سوعىلادى.
