08:56, 02 - قىركۇيەك 2016 | GMT +5
برازيليانىڭ بۇرىنعى پرەزيدەنتى ديلما رۋسەف وزىنە جاريالانعان يمپيچمەنتكە قارسى شاعىم ءتۇسىردى
استانا. قازاقپارات - برازيليانىڭ بۇرىنعى پرەزيدەنتى ديلما رۋسەف جوعارعى سوتقا سارسەنبى كۇنى سەنات قابىلداعان ونى برازيليا پرەزيدەنتى قىزمەتىنەن تايدىرۋ تۋرالى شەشىمگە قارسى شاعىم ءتۇسىردى.
الايدا، ساراپشىلار رۋسەفتىڭ مۇمكىندىگى وتە از دەپ سانايدى. بۇل تۋرالى BBC جازادى.
رۋسەفتىڭ قورعاۋشىسى ءوز قامقورلىعىنداعى ايىپتالۋشىنىڭ ءىسىن قايتادان قاراۋدى سۇرادى. وعان ەل بيۋدجەتىنە قاتىستى قۇيتىرقىلىق جاسادى دەگەن ايىپ تاعىلعان بولاتىن. قورعاۋشى ءىستى قايتا قاراۋ كەزىندە ءبىر كۇن بۇرىن رەسمي تۇردە مەملەكەت باسشىسى قىزمەتىنە كىرىسكەن ميشەل تەمەردى پرەزيدەنتتىڭ مىندەتىن اتقارۋشى ەتىپ تاعايىنداۋدى سۇرادى.
ەسكە سالا كەتەيىك، سارسەنبى كۇنى كەشكە سەنات ديلما رۋسەفتى بيۋدجەت زاڭناماسىن بۇزدى، سونىڭ ىشىندە 2014-جىلى سايلاۋ ناۋقانى كەزىندە بيۋدجەت تاپشىلىعىنىڭ ناقتى سوماسىن جاسىردى دەپ تانىپ، ونى تاقتان تايدىردى.
رۋسەف وعان تاعىلعان بار ايىپتى جوققا شىعارىپ وتىر. كەرىسىنشە، ول ونىڭ قارسىلاستارى ساياسي الاياقتىق جاساپ وتىر دەپ سانايدى.
