دەپۋتاتتار قانداي دەمالىس ورىندارىندا ءجيى دەمالادى؟

استانا. قازاقپارات - بۇگىن پارلامەنت پالاتالارىنىڭ بىرلەسكەن وتىرىسى اياسىندا جۋرناليستەرگە سۇحبات بەرگەن دەپۋتات مايرا ايسينا حالىق قالاۋلىلارى ءجيى دەمالاتىن ورىنداردى اتاپ بەردى.

ونىڭ ايتۋىنشا، قازاقستاندا ءالى دە قىزمەت كورسەتۋ ساپاسىن جەتىلدىرۋ كەرەك، دەپ حابارلايدى Baq.kz.

«ەندى، بىزدە بۋرابايدا، سوسىن ەسەنتۋكي جانە مىناۋ الاتاۋ... بيىل ءبىز ەسەنتۋكيگە ءۇشىنشى رەت بارىپ كەلدىك. سول ءۇش رەت بارسا، دەنساۋلىققا جاقسى اسەر ەتەدى دەيدى»، - دەدى م. ايسينا.

دەگەنمەن، كەيبىر جەرلەردىڭ قىزمەت كورسەتۋ ساپاسىنا دەپۋتاتتىڭ كوڭىلى تولمايدى.

«شىنىن ايتۋ كەرەك، بىلتىر مەن الاكولگە بارىپ كەلدىم. ەكى جۇماداي بولدىق. ەندى، سۋى جاقسى، ادامدارى جاقسى. ءبىراق سەرۆيس جوقتىڭ قاسى. سوندىقتان ەكى جۇما ازەر شىدادىق. دەگەنمەن، ءبىر توپ دەپۋتاتتارمەن ادەيى بارىپ كورگەنىمىز دۇرىس بولدى. كاسىپكەرلەردىڭ كوزقاراسىن وزگەرتۋ كەرەكتىگىن تۇسىندىك. ونى ايتتىق تا. ايتپەسە، ولار حالىق ايتەۋىر كەلەدى دەپ، ءبارىن قالاي بولسا، سولاي جاساي سالادى ەكەن»، - دەپ اتاپ كورسەتتى دەپۋتات.

ونىڭ ايتۋىنشا، اتالعان ساپاردان كەيىن دەپۋتاتتار ۇكىمەتتىڭ اتىنا ساۋال جولداپ، الماتىدان قاتىنايتىن پوەزد بەن سەمەي جاقتان ۇشاتىن رەيستى قايتا قالپىنا كەلتىردى. دەگەنمەن، الاكولگە باراتىن جولدىڭ ساپاسى ءالى دە ناشار بولىپ تۇر. ونى دا دەپۋتاتتار ءبىلىپ وتىر.