تانىمال قازاقستاندىق شاحماتشى قىز ەندى رەسەيدىڭ نامىسىن قورعايدى

استانا. قازاقپارات - ەلىمىزدەگى تالانتتى شاحماتشى قىزداردىڭ ءبىرى ءبيبىسارا اساۋبايەۆا الداعى ۋاقىتتا جارىستارعا رەسەيدىڭ اتىنان شىعاتىن بولادى.

بۇل تۋرالى  chess-news.ruسايتىنا سىلتەمە جاساپ، BAQ.kz حابارلاپ وتىر.

ءبيبىاسارا ەلىمىزدەگى تالانتتى شاحماتشىلاردىڭ ءبىرى. جاستىعىنا قاراماستان وقۋشىلار اراسىندا ءۇش مارتە الەم چەمپيوناتىن ۇتقان. ءبىر رەت 8 جاسقا دەيىنگى بۇلدىرشىندەر اراسىندا الەم بىرىنشىلىگىندە توپ جارعان. 7 جاسىندا ايەلدەر اراسىنداعى فيدە شەبەرى اتاعىن العان.

ەندى، مىنە، اساۋبايەۆا قازاقستاننىڭ ەمەس، رەسەيدىڭ اتىنان شىعاتىن بولدى. سپورتشى قىزدى ماسكەۋ وبلىسىنىڭ شاحمات فەدەراتسياسىنىڭ پرەزيدەنتى سەرگەي نەستەروۆ شاقىرعان. ءبيبىسارا قازىرگى ماسكەۋ وبلىسىنا قاراستى حيمكي قالاسىندا تۇرادى.

ءبيبىسارا تاراز قالاسىنىڭ تۋماسى. 2004-جىلى 26- اقپاندا دۇنيەگە كەلگەن. تانىمال ينتەلەكتۋالدىق ويىنعا 4 جاسىندا اتاسى باۋلىعان ەكەن.

شاحماتشى قىزدىڭ اناسى ليانا تاڭجارىقوۆا بۇعان دەيىنگى بەرگەن سۇحباتتارىندا فەدەراتسيا تاراپىنان قولداۋدىڭ ازدىعىن ايتقان بولاتىن.

ايتا كەتەيىك، ءبيبىسارا شاحماتتان بولەك، كوركەم گيمناستيكامەن دە اينالىسادى. سپورتتىڭ بۇل تۇرىنەن استانا قالاسىنىڭ ەكى دۇركىن چەمپيونى اتانعان. بولاشاقتا كوركەم گيمناستيكادان وليمپيادا چەمپيونى بولۋدى جانە شاحماتتان ايەلدەر اراسىندا الەم چەمپيونى اتانۋدى كوزدەيتىنىن جەتكىزگەن بولاتىن.