پوليتسەيلەردى تىستەپ العان سەمەيلىك سوتتا ءوز ارەكەتىنە وكىندى
2№ سوت سەمەي تۇرعىنىنا قاتىستى ق ر قىلمىستىق كودەكسىنىڭ 380-بابىنىڭ 1-بولىگى («بيلىك وكىلىنىڭ ءوز لاۋازىمدىق مىندەتتەرىن اتقارۋىنا بايلانىستى وعان نەمەسە ونىڭ جاقىندارىنا قاتىستى ومىرىنە نەمەسە دەنساۋلىعىنا ءقاۋىپتى ەمەس كۇش قولدانۋ نە كۇش قولدانۋ قاتەرىن ءتوندىرۋ») بويىنشا قىلمىستىق ءىس قارالدى.
«شاقىرتۋ بويىنشا كەلگەن پوليتسيا قىزمەتكەرلەرى كوپ پاتەرلى ءۇيدىڭ كىرەبەرىسىندە سوتتالۋشىنى ماس كۇيىندە كەزىكتىرگەن. قۇقىق قورعاۋ ورگاندارىنىڭ قىزمەتكەرلەرى ماس ادامعا وزىمەن ءجۇرۋدى ۇسىنعان. كولىكتىڭ سالونىندا وتىرىپ، بۇزاقى ءبىر پوليتسەيدىڭ سول يىعىن تىستەپ الىپ، ەكىنشى پوليتسەيدىڭ وڭ قولىنىڭ ساۋساعىن تىستەپ العان. پوليتسەيلەردىڭ ءوز لاۋازىمدىق مىندەتتەرىن اتقارۋىنا بايلانىستى وعان دەنساۋلىعىنا قاۋىپتى ەمەس كۇش قولدانعان»، - دەدى سوت باسپا ءسوز قىزمەتىندەگىلەر.
ايىپتالۋشى ءوز كىناسىن تولىعىمەن مويىنداپ، ىستەگەن ارەكەتىنە وكىنىپ، كەشىرىم سۇرادى.
سوت ايىپتالۋشىنى كىنالى دەپ تاۋىپ، 1 جىل 6 ايعا باس بوستاندىعىن شەكتەۋ جازاسىن بەلگىلەدى. سوت ۇكىمى زاڭدى كۇشىنە ەنگەن جوق.
