ۇكىمەت پەن ۇلتتىق بانكتىڭ داعدارىسقا قارسى ءىس-قيمىل جوسپارى جاڭا شارالارمەن تولىقتىرىلادى

استانا. قازاقپارات - مەملەكەت باسشىسى نۇرسۇلتان نازاربايەۆ قازاقستان رەسپۋبليكاسى پارلامەنتىنىڭ ەكىنشى سەسسياسىنىڭ اشىلۋىنا قاتىستى، دەپ حابارلايدى اقوردانىڭ باسپا ءسوز قىزمەتى.

قازاقستان رەسپۋبليكاسى پارلامەنتىنىڭ سەسسياسىن اشقان ەلباسى سىندارلى زاڭ شىعارۋ ءداستۇرىن جالعاستىرۋ قاجەت ەكەنىن اتاپ ءوتتى.

- جاڭا زاڭداردى ازىرلەۋ مەن قابىلداۋدىڭ بارلىق ماسەلەلەرى جونىندە ۇكىمەتپەن تىعىز ءارى ۇيلەسىمدى ءوزارا ءىس-قيمىل جۇرگىزۋ قاجەت. وسى ورايدا، زاڭدار تياناقتى ءارى ساپالى ازىرلەنگەن بولۋى ءتيىس. اسىرەسە سەنات پەن ءماجىلىس دەپۋتاتتارىنىڭ حالىققا جاڭا زاڭنامانىڭ ماقساتتارى مەن مىندەتتەرىن جەتكىلىكتى تۇردە تۇسىندىرۋدەگى ءرولىن ارتتىرۋ ماڭىزدى، - دەدى نۇرسۇلتان نازاربايەۆ.

قازاقستان پرەزيدەنتى الەمدىك ەكونوميكا مەن ساياساتتاعى كۇردەلى جاعدايعا نازار اۋداردى.

- الەمدەگى كوپتەگەن ەكونوميكاسى دامىعان جانە دامۋشى مەملەكەتتەر قيىندىقتى باستان كەشۋدە. ەلدەر اراسىنداعى ينۆەستيتسيا اعىنىنىڭ كولەمى ازايدى. ءبىز الەمدىك ەكونوميكانىڭ بولىگى بولعاندىقتان، مۇنىڭ ءبارى قازاقستانداعى جاعدايعا دا كەرى اسەرىن تيگىزۋدە. وسىنداي جاعدايدا ۇكىمەت پەن ۇلتتىق بانكتىڭ داعدارىسقا قارسى ءىس-قيمىل جوسپارىنىڭ ىسكە اسىرىلۋى جالعاسا بەرەدى، ول جاڭا شارالارمەن ۋاقتىلى تولىقتىرىلىپ وتىرادى، - دەدى نۇرسۇلتان نازاربايەۆ.

مەملەكەت باسشىسى دەپۋتاتتىق كورپۋستى الدا اۋقىمدى جۇمىس كۇتىپ تۇرعانىن ايتتى.

- جاڭا سەسسيانىڭ اياسىندا سىزدەرگە 50 شاقتى زاڭ جوباسىن تالقىلاپ، قابىلداۋ قاجەت. 7 جاڭا زاڭدى قابىلداۋعا دەپۋتاتتار باستاماشىلىق ەتتى جانە ونى ۇكىمەت قولدادى. بۇل باستامالار - دەپۋتاتتىق كورپۋستىڭ جوعارى كاسىبيلىگىنىڭ ايقىن دالەلى. وتكەن سەسسيا اياسىنداعى 28 جوبا بويىنشا تالقىلاۋ ۇدەرىسى باستالدى، - دەدى قازاقستان پرەزيدەنتى.

بۇدان بولەك، نۇرسۇلتان نازاربايەۆ پارلامەنت پالاتالارى قىزمەتىنىڭ بارىنشا جاريالى بولۋى قاجەتتىگىنە توقتالدى.

- زاڭداردى قابىلداۋدىڭ قاجەتتىگى مەن بۇكىل قيسىنى قازاقستاندىقتارعا ايقىن ءارى تۇسىنىكتى بولعانى ماڭىزدى. كۇزگى سەسسيادان باستاپ سەنات پەن ءماجىلىس جۇمىسىنىڭ، سونداي-اق پارلامەنت پالاتالارىنىڭ بىرلەسكەن وتىرىستارىنىڭ تىكەلەي ونلاين- كورسەتىلىمىن ەنگىزۋ بۇعان سەپتىگىن تيگىزەتىن بولادى. سونىمەن قاتار، زاڭ شىعارۋ ۇدەرىسىنىڭ اياسىن كەڭەيتۋ قاجەت. جوبالاردى ازىرلەۋ كەزەڭىندە وعان قوعامدىق ساراپشىلار، پارلامەنتتىك ەمەس پارتيالار مەن ۇكىمەتتىك ەمەس ۇيىمدار جانە ب ا ق وكىلدەرىن تارتۋ كەرەك. حالىقتى الدىن الا اقپاراتتاندىرۋ جانە ءتيىستى قۇقىقتىق جاڭالىق- وزگەرىستەردى قوعامدىق تالقىلاۋ جونىندەگى ەىدۇ ەلدەرىنىڭ تاجىريبەسىن بەلسەنە قولدانۋ كەرەك، - دەدى ەلباسى.

ءسوزىنىڭ سوڭىندا نۇرسۇلتان نازاربايەۆ جينالعانداردى كەزەكتى پارلامەنتتىك سەسسيانىڭ باستالۋىمەن قۇتتىقتاپ، زور دەنساۋلىق جانە جەمىستى جۇمىس تىلەدى.

قازاقپارات مەملەكەت باسشىسى ءسوزىنىڭ تولىق نۇسقاسىن ۇسىنادى.

قۇرمەتتى دەپۋتاتتار!

قۇرمەتتى ۇكىمەت مۇشەلەرى!

قازاقستان رەسپۋبليكاسى كونستيتۋتسياسىنىڭ 59-بابىنا سايكەس التىنشى شاقىرىلىمداعى پارلامەنتتىڭ ەكىنشى سەسسياسىن اشىق دەپ جاريالايمىن.

قۇرمەتتى دەپۋتاتتار!

بارشاڭىزدى جاڭا پارلامەنتتىك ماۋسىمنىڭ باستالۋىمەن قۇتتىقتايمىن.

جەر-جەردە سايلاۋشىلارمەن كەزدەسىپ، جاڭا وي-پىكىرلەر جيناقتادى دەپ سەنەمىن.

بيىلعى سەسسيا قاستەرلى تاۋەلسىزدىگىمىزدىڭ 25 جىلدىعىن تويلايتىن كەزەڭگە ساي كەلىپ وتىر.

قازىر الەمدىك ەكونوميكا اسا كۇردەلى كەزەڭدەردىڭ ءبىرىن باستان وتكەرۋدە.

شەكارا تالعامايتىن تەرروريزم مەن ەكسترەميزم دۇنيەنىڭ بارلىق قيىرىن شارپىپ كەلەدى.

مۇنىڭ ءبارى جاھاندىق الەمنىڭ اجىراماس بولىگى - قازاقستانعا دا ىقپالىن تيگىزۋدە.

سوعان قاراماستان، ءبىز زاماننىڭ سىن-قاتەرلەرىنە لايىقتى جاۋاپ بەرۋ ءۇشىن زور قىزمەتتەر اتقارىپ كەلەمىز.

ەلىمىز تاۋەلسىزدىك تاريحىنىڭ ەكىنشى شيرەگىن تىڭ قارقىنمەن باستايدى دەپ سەنەمىن.

ءبىز «قازاقستان-2050» ستراتەگياسىندا كوزدەگەن ماقساتتارىمىزعا ۇزدىكسىز ۇمتىلاتىن بولامىز.

الدىمىزدا ۇلكەن مىندەتتەر مەن اۋقىمدى جۇمىستار تۇر.

بۇل ورايدا، پارلامەنتكە دە زور جاۋاپكەرشىلىك جۇكتەلەدى.

5 ينستيتۋتتىق رەفورمانى جۇزەگە اسىرۋدىڭ ۇلت جوسپارىن زاڭنامالىق قامتاماسىز ەتۋ قارقىنمەن جالعاسىن تابۋى قاجەت.

ەلىمىزدىڭ دامۋىنا قاجەتتى كوپتەگەن زاڭدار قابىلداۋ كەرەك.

ولاردىڭ ىشىندە كەزەك كۇتتىرمەيتىن، قىسقا مەرزىمدە قابىلداۋ قاجەت زاڭدار بار.

مەن كاسىبي پارلامەنتىمىز وزىنە جۇكتەلگەن تاريحي مىندەتىن ابىرويمەن اتقارارىنا سەنىمدىمىن.