وش قالاسىندا قازاقستان قارجىسىنا سالىنعان جاڭا مەكتەپ اشىلدى

بىشكەك. قازاقپارات - بۇگىن وش قالاسىندا قازاقستان قارجىسىنا سالىنعان جاڭا مەكتەپ-ليتسەيدىڭ سالتاناتتى اشىلۋ ءراسىمى ءوتتى.

اشىلۋ راسىمىنە قىرعىزستاننىڭ پرەمەر-ءمينيسترى سوورونباي جەەنبەكوۆ، قالا مەرى ايتمامات كادىربايەۆ، قىرعىزستانداعى قازاقستان ەلشىلىگىنىڭ كەڭەسشىسى عالي شايماقوۆ قاتىستى.

«جاڭا زاماناۋي مەكتەپ ق ر پرەزيدەنتى نۇرسۇلتان نازاربايەۆتىڭ باستاماسىمەن سالىندى. ونىڭ قۇرىلىسىنا قازاقستان 500 ميلليون تەڭگە ءبولدى. مەكتەپ 550 وقۋشىنى قابىلداي الادى جانە ناقتى عىلىمدارعا بەيىمدەلگەن ەكسپەريمەنتتىك باعدارلاما بويىنشا جۇمىس ىستەيتىن بولادى. ءبىلىم بەرۋ قىرعىز جانە ورىس تىلدەرىندە جۇرگىزىلەدى»، - دەپ حابارلادى مەكتەپ ديرەكتورى كىيالبەك اكماتوۆ «قازاقپارات» تىلشىسىنە.

«مەكتەپتە تەستىلەۋدەن وتكەن ۇزدىك وقۋشىلار عانا وقيتىن بولادى. ءبىلىم بەرۋ حيميا، بيولوگيا، ماتەماتيكا، ينفورماتيكا جانە اعىلشىن ءتىلى پاندەرىن تەرەڭ وقىتاتىن ەكسپەريمەنتتىك باعدارلاما بويىنشا جۇزەگە اسادى»، - دەدى ك. اكماتوۆ.

ايتا كەتەيىك، 2010-جىلى وش، جالال-اباد جانە وش وبلىسىنىڭ اۋدانى زارداپ شەككەن وقيعادان كەيىن قازاقستان پرەزيدەنتى جاڭا مەكتەپ قۇرىلىسىنا قاراجات ءبولدى.