ءبىلىم كۇنىن ارنايى اتاپ وتپەيتىن ەلدەر - فوتو
1- قىركۇيەك - الەم ەلدەرىنىڭ بارلىعىندا بىردەي ءبىلىم كۇنى رەتىندە تويلانبايدى. كوبىنە كەڭەستىك قۇرامدا بولعان ەلدەر مەن ۇلى بريتانيا، بەلگيا، يزرايل، ۆەنگريا، يرلانديا، قىتايدا ت. ب. اتالىپ وتىلەدى. ال كوپ ەلدەر ءبىلىم كۇنىن اتاۋلى مەرەكە رەتىندە تويلامايدى دا.
ا ق ش
ا ق ش- تا ءبىلىم كۇنى دەگەن مەرەكە جوق. رەسمي تۇردە ارنايى كۇن دە بەلگىلەنبەگەن. كوبىنە وقۋشىلار تامىز ايىنىڭ ءۇشىنشى دۇيسەنبىسىندە مەكتەپ تابالدىرىعىن اتتايدى. سونداي-اق وقۋ كۇنىن ءار شتاتتىڭ باسشىلىعى ءارقالاي بەلگىلەيدى.
ارگەنتينا
وڭتۇستىك امەريكا قۇرلىعىندا ورنالاسقان بۇل ەلدە دە ءبىلىم كۇنى رەسمي تۇردە اتالىپ وتىلمەيدى. لاتىن امەريكاسىنداعى وزگە ەلدەر (برازيليا، كوستا-ريكا، ۋرۋگۆاي) سەكىلدى، ارگەنتينادا دا وقۋ كۇزدىڭ كەلۋىمەن (اقپان-ناۋرىز) باستالادى.
يسپانيا
پيرەنەي تۇبەگىندەگى ەلدە وقۋ جىلى استىقتىڭ جينالۋ مەزگىلىنە بايلانىستى بەلگىلەنەدى. سوندىقتان دا ءبىلىم كۇنى ارنايى ءبىر كۇنگە بەلگىلەنبەگەن. كوبىنە وقۋدىڭ باستالۋى - قىركۇيەك ايىنىڭ ورتا تۇسىنا سايكەس كەلەدى.
گەرمانيا
گەرمانيادا وقۋ جىلى ءبىرىنشى قىركۇيەكتە باستالمايدى، دەگەنمەن تامىزدىڭ اياعىندا نەمەسە قىركۇيەكتىڭ باسىندا، ايتەۋىر قازان ايىنان بۇرىن باستالۋى كەرەك. مەكتەپ تابالدىرىعىن اتتاعان ءاربىر بۇلدىرشىنگە «ءبىرىنشى سىنىپ قاپشىعى» اتتى ءداستۇرلى سىي تارتۋ ەتىلەدى.
يتاليا
يتاليادا دا ءبىلىم كۇنى رەسمي تۇردە بەلگىلەنبەگەن. ءار ايماعىندا ءار ءتۇرلى باستالادى. كوبىنە اۋا رايىنا بايلانىستى بولادى. ەلدىڭ وڭتۇستىگىندە كۇن ىستىق بولعاندىقتان، وقۋشىلار مەكتەپكە كەش بارادى.
ميانما
ازيانىڭ بۇل ەلىندە ءبىلىم كۇنى رەسمي تۇردە بەلگىلەنبەگەن. وقۋشىلار مەكتەپكە قىركۇيەك ايىنىڭ ەكىنشى سارسەنبىسىندە بارادى.
افريكا ەلدەرى
قارا قۇرلىقتىڭ كوپ ەلدەرىندە وقۋ جىلى بىزدەگىدەي 1- قىركۇيەكتەن باستالادى. ال ەفيوپيا، نيگەريا، سومالي مەن الجيردە وقۋشىلار مەكتەپكە قىركۇيەكتىڭ العاشقى جەكسەنبىسىندە بارادى. سوندىقتان دا بۇل ەلدەردە ارنايى ءبىر كۇن بەكىتىلمەگەن.
تاياۋ شىعىس ەلدەرى
تاياۋ شىعىس ەلدەرىنىڭ بارلىعى ءبىلىم كۇنىن ارنايى بەلگىلەمەگەن. ماسەلەن يراندا وقۋ جىلى پارسى كۇنتىزبەسىنە بايلانىستى بەلگىلەنسە، ومان مەن ساۋد ارابياسىندا وقۋ قىركۇيەكتىڭ العاشقى اپتاسىندا باستالادى.
massaget.kz
