وليمپيادا چەمپيوندارى ەلوردالىق وقۋشىلاردى جاڭا وقۋ جىلىمەن قۇتتىقتادى

استانا. قازاقپارات - بۇگىن ەلىمىزدىڭ بارلىق مەكتەپتەرىندە العاشقى قوڭىرۋ سوعىلىپ، سالتاناتتى جيىندار ۇيىمداستىرىلدى.

بۇل كۇن ءبىلىم ۇيالارى جازعى دەمالىستان كەلگەن بۇلدىرشىندەرگە ەسىكتەرىن ايقارا اشىپ قۋانىشپەن قارسى الاتىن كۇن. وسى كۇنى استانا قالاسىنداعى «نۇر وردا» مەكتەپ-ليتسەيىندە دە العاشقى قوڭعىراۋ سوعىلىپ، ءبىلىم كۇنىنە ارنالعان مەركەلىك شارا ءوتتى.

ءۇش اي دەمالىستان كەيىن مەكتەپ ءىشى وقۋشىلارعا تولىپ ەرەكشە كوڭىل-كۇي سىيلاپ تۇردى.

وعان بۇلدىرشىندەردىڭ ۋ-شۋى مەن ۇستازداردى قۇتتىقتاعان اتا-انالاردى قوسىڭىز. مىنە، ءدال وسىنداي كوڭىل كۇيمەن مەكتەپ باسشىسى ورحان وزتومسۋك سالتاناتتى جيىندى اشىپ بەردى. ديرەكتوردىڭ جۇرەك جاردى قۇتتىقتاۋ سوزدەرىنەن كەيىن 2016-جىلعى برازيليانىڭ ريو-دە-جانەيرو قالاسىندا وتكەن وليمپيادادا توپجارعان سپورتشىلارىمىز، اتاپ ايتقاندا، بوكستان التىننان القا تاققان دانيار ەلەۋسىنوۆ، كۇمىس مەدال يەگەرى ۆاسيلي ليەۆيت جانە ايەلدەر كۇرەسىنەن كۇمىس جۇلدەگەر اتانعان گۇزەل مانيۋروۆا وقۋشالارعا جاڭا وقۋ جىلىنا ەرەكشە شابىت بەرىپ، ءبىلىم باسەكەلەرىندە تولاعاي تابىس تىلەدى.

وسىنداي جۇلدەگەر سپورتشىلارىمىزدىڭ جىلى لەبىزدەرىنەن كەيىن بيىل رەسەيدە وتكەن حالىقارالىق «بالالار جاڭا تولقىنى» جاس ورىنداۋشىلار بايقاۋىندا ءۇشىنشى ورىن العان «نۇر وردا» مەكتەبىنىڭ 5- سىنىپ وقۋشىسى جانەل ءسادۋاقاس «قازاق ەلى وسىنداي» ولەڭىن جوعارى دەيڭگەيدە ورىنداپ، كوپشىلىكتىڭ قوشەمەتىنە بولەندى.

ودان ءارى قاراي بۇلدىرشىندەر ولەڭ ايتىپ، ءبي بيلەدى. قالاي دەسەك تە، بۇگىنگى شارانىڭ قۇرمەتتى قوناقتارى ارينە وقۋشىلار بولدى. تاڭ اتا ەرتە تۇرىپ، تازا كيىمدەرىن كيىپ، قولدارىنا گۇل شوقتارىن الىپ ۇستازدارىمەن قاۋىشتى. ال، مەكتەپ تابالدىرىعىن العاش رەت اتتاعان 110 وقۋشى ەلباسىنىڭ ءوزى كەلىپ اشقان «نۇر وردا» مەكتەبىنىڭ سىنىپتارىنا «تارىداي» بولىپ كىردى.

مەكتەپ مەرەكەسىنىڭ سوڭىندا وليمپيادا چەمپيوندارى وقۋ بارىسىندا بالالاردىڭ شابىتتارى سارقىلماسىن دەگەن نيەتپەن سىنىپتاردى ارالاپ، وقۋشىلارمەن سۋرەتكە ءتۇسىپ، قولتاڭبالارىن قالدىردى.