امىرە قاشاۋبايەۆ تۋرالى كوركەم فيلم تۇسىرىلۋدە

استانا. قازاقپارات - بۇگىن الماتى وبلىسىنداعى ءۇشقوڭىر جايلاۋىندا قازاقتىڭ قارا دومبىراسى مەن ءانىن الەمگە ايگىلى ەتكەن ءانشى امىرە قاشاۋبايەۆ تۋرالى العاش قولعا الىنعان كوركەم فيلمنىڭ سوڭعى كورىنىستەرى ءتۇسىرىلىپ ءبىتتى.

ءتۇسىرۋ جۇمىستارى بيىل شىلدەدە لاتۆيا استاناسى ريگادا باستالعان بولاتىن. كينوتۋىندىنى «قازاق فيلم» كينوستۋدياسى ماماندارى مەن امەريكالىق رەجيسسەر دجەف ۆەسپا بىرلەسىپ ءتۇسىرىپ جاتىر.

 باستى ءرولدى بۇعان دەيىن بىرنەشە وتاندىق كينوعا ءتۇسىپ، تانىلىپ ۇلگەرگەن سانجار ماديەۆ وينايدى. فيلم اعىلشىن تىلىندە تۇسىرىلۋدە. كينو نەگىزىنەن باتىس ەلدەرى اۋديتورياسىنا ارنالعان. «ماقسات -  قازاقتىڭ امىرەسىن الەمگە تانىتۋ»، -  دەيدى شىعارماشىلىق ۇجىم. وتاندىق ونەرتانۋشىلار بولسا، بۇل فيلمدە تاريحي وقيعالار قايشىلىعى كوپ، ءارى ناعىز قازاقتىڭ امىرەسىنىڭ بەينەسى وتە از دەپ وتىر.

 فيلمدە قازاقتىڭ دومبىراسى كۇمبىرلەپ، «دۋدار- اي»، «بالقاديشا»، «سۇرجەكەي» اندەرى شىرقالادى. جاڭا تۋىندى كەلەسى جىلى جارىققا شىعادى دەپ جوسپارلانۋدا.

سانجار ماديەۆ، اكتەر - امىرە قاشاۋبايەۆتى ويناۋ ءۇشىن ءبىراز ىزدەندىم. ازداپ دومبىرا شەرتۋدى ۇيرەندىم. قازاق تاريحىنداعى مۇنداي ءىرى تۇلعانى ەل ەسىندە قالاتىنداي ەتىپ ويناۋعا تىرىسىپ جاتىرمىن. باعاسىن تۋىندى ەكرانعا شىققان سوڭ كورەرمەن بەرە جاتار.

www.khabar.kz