ەكى عاسىرعا جۋىق تاريحى بار قازان

  استانا. قازاقپارات - بولاشاق اۋىلدىق وكرۋگىنە ءىسساپارىمىز بارىسىندا قۇندى تاريحي جادىگەردىڭ كۋاسى بولدىق. ول وسى وكرۋگكە قاراستى جاڭاتاڭ اۋىلىنىڭ تۇرعىنى نۇرلىبەك وتاروۆ پەن اقمارال وماروۆانىڭ ۇيىندە ساقتاۋلى تۇرعان، ەكى عاسىرعا جۋىق تاريحى بار شويىن قازان.

قازاننىڭ يەسى اقمارالدىڭ ايتۋى بويىنشا، اتاسى ءىزمۇراتتىڭ اعاسى وتەمۇرات وماروۆ 1940 -جىلدارى ءىستى بولىپ، تومسك قالاسىندا جۇرگەن كەزىندە، سول جاقتان ەلگە الىپ كەلگەن. سول كەزدەن بەرى اتادان بالاعا مۇرا بولىپ كەلە جاتقان قازاننىڭ جانىندا 1831 جانە پزمز دەگەن جازۋى بار.

الەۋمەتتىك جەلى ارقىلى ىزدەستىرگەنىمىزدە پزمز جازۋى بايىرعى تاريحى بار پەتروۆسكو- زابايكالسك مەتاللۋرگيا زاۋىتىندا جاسالعانىن، ال، 1831 جازۋ قازاننىڭ قۇيىلعان جىلىن بىلدىرەدى. سول كەزدە بۇل زاۋىتتا رەسەي تاريحىندا وزىندىك ءىز قالدىرعان «جەلتوقسانشىلار» (دەكابريستەر) جۇمىس جاساعان ەكەن. بۇل قۇندى جادىگەر اۋدان تاريحىنان سىر شەرتەتىن ولكەتانۋ مۇراجايىنا تاپسىرىلسا، كەيىنگى جاس ۇرپاققا مۇرا بولىپ قالارى ءسوزسىز.

«ەگەمەن قازاقستان»