ق ر قارۋلى كۇشتەرىنىڭ دەسانتشىلارى سۋ كەدەرگىلەرىنەن ءوتتى
قازاقستاندىق دەسانتشىلار تەحنيكادا سۋ بوگەتتەرىنەن ءوتۋدى پىسىقتادى، دەپ حابارلادى ق ر ق م باسپا ءسوز قىزمەتى. پراكتيكالىق ءىس- قيمىلدار ارنايى جابدىقتالعان سۋ قويماسىندا ءوتتى. ونىڭ تەرەڭدىگى 4,5 مەتردى قۇرايدى. اسكەري تەحنيكانىڭ جۇزبەلى قوزعالىسىنىڭ ءبىرقاتار ايىرماشىلىقتارى مەن ەرەكشەلىكتەرى بار. سۋدا ماشينانى تىزگىندەۋ كەزىندە بارلىعى «بوگەلىپ» ىسكە اسىرىلادى. ياعني، قۇرلىقپەن سالىستىرعاندا، ماشينا بىردەن باعىنا قويمايدى. اسكەري قىزمەتشىگە باسقارۋ تەتىگىنىڭ (رولدىڭ) قالاي جۇمىس جاسايتىنىن سەزىنۋ قاجەت.
وقۋ جاتتىقتىرۋدىڭ ماقساتى جەكە قۇرامعا سۋ كەدەرگىلەرىن بۇزىپ وتۋگە قارۋ- جاراق پەن اسكەري تەحنيكانى دايىنداۋ بويىنشا جۇمىستار تىزبەسىنە وقىتىپ- ۇيرەتۋ، سۋدان ماشينالاردى كوشىرۋ تاسىلدەرىن كورسەتۋ، سۋ بوگەتتەرىن بۇزىپ ءوتۋ، سونداي- اق، ماشينالاردان كوشىرۋ كەزىندە قاۋىپسىزدىك شارالارىن زەردەلەۋ بولىپ تابىلادى. ساباقتارعا 61993, 18404, 32363, 12740, 29108 اسكەري بولىمدەرىنەن 400-گە جۋىق اسكەري قىزمەتشى تارتىلدى. مۇنداي جاتتىعۋلار ق ر قارۋلى كۇشتەرىندە جىل سايىن وتۋدە.
