ەلوردا قاجىلارى قاسيەتتى ساپارعا اتتاندى-فوتو
وتانداستارىمىزدى شىعارىپ سالۋ شاراسىنا قازاقستان مۇسىلماندارى ءدىني باسقارماسىنىڭ نايب ءمۇفتيى ناۋرىزباي قاجى تاعان ۇلى مەن اپپارات باسشىسى عيلىمبەك ماجيەۆ قاتىسىپ، اق نيەت، دۇعا- تىلەكتەرىن ايتتى، دەپ حابارلايدى muslim.kz.
«بۇگىندە ءدىني باسقارما تاراپىنان قاسيەتتى قاجىلىق ساپارىنا ۇلكەن ماڭىز بەرىلىپ، قىزمەت ساپاسىن ارتتىرۋعا دەن قويىلدى. باس ءمۇفتيىمىز وسى ماقساتتا ارناۋلى قاجىلىق ميسسياسىن قۇرىپ، ونىڭ قۇرامىنا سىزدەردىڭ قىزمەتتەرىڭىزگە بىلىكتى دە ءبىلىمدى ءدىن ماماندارىن، دارىگەرلەر مەن جۋرناليستەر قوسىنىن قوستى. اسىل ءدىنىمىزدى دارىپتەپ، يماندىلىقتى ناسيحاتتاۋعا وسىنداي كەڭشىلىك بەرگەن اۋەلى اللا تاعالاعا ماقتاۋ- ماداقتار بولسىن. مەملەكەتىمىز دە ءداستۇرلى دىنىمىزگە ۇلكەن قامقورلىق تانىتىپ كەلەدى. جىل سايىن قاجىلىققا بارۋعا نيەتتى جاندار قاتارى ارتۋدا. بۇگىندە ەل تاريحىندا تۇڭعىش رەت ساۋد ارابياسىنا ەلىمىزدەن تىكەلەي اۋە رەيستەرى ىسكە قوسىلىپ وتىر. سىزدەرگە قاسيەتتى قاجىلىق ساپارىنا امان بارىپ، وتانىمىزعا ەسەن ورالۋلارىڭىزعا تىلەكتەستىك بىلدىرەمىز. اللا تاعالا قاجىلىقتارىڭىزدى قابىل قىلعاي»، - دەدى نايب ءمۇفتيى ناۋرىزباي قاجى تاعان ۇلى.
ايتا كەتسەك، قازاقستان مەن ساۋد ارابياسى كورولدىگى اراسىنداعى ورتاق كەلىسىمگە سايكەس، حالىقارالىق «FlyNas» اۋە كومپانياسى ەل قاجىلارىنا قىزمەت كورسەتەدى. قازاقستان قاجىلارى ەندىگى ۋاقىتتا وسى كومپانيا ارقىلى تىكەلەي ءمادينا، دجيددا قالالارىنا ۇشا الادى.
