ق ر قورعانىس ءمينيسترى وليمپيادا ويىندارىنىڭ قولا جۇلدەگەرى ولگا رىپاكوۆاعا قۇرمەت كورسەتتى - فوتو
بۇل تۋرالى ق ر قورعانىس مينيسترلىگىنىڭ باسپا ءسوز قىزمەتىنەن حابارلادى.
«بارشا اسكەري قىزمەتشىلەردىڭ جانە جەكە ءوزىمنىڭ اتىمنان بارلىق ارمياشى سپورتشىلاردىڭ كۇش-جىگەرىن اتاپ وتكىم كەلەدى. جانە ارينە، جەڭىل اتلەتيكادا بيىك شىڭدى باعىندىرىپ، ءۇشىنشى ورىنعا قول جەتكىزگەن ءبىزدىڭ ولگا رىپاكوۆانى قۇتتىقتاعىم كەلىپ وتىر. ءسوزسىز، بارلىق ماراپاتتارىڭىزدىڭ ىشىندە «قولا» جۇلدەڭىزدىڭ الار ورنى ايرىقشا. ەلباسىمىز - ق ر قارۋلى كۇشتەرىمىزدىڭ جوعارعى باس قولباسشىسى اتاپ وتكەندەي، ول «التىن» جۇلدەگە ابدەن لايىق، سەبەبى، لوندون مەن ريو وليمپيادالارى اراسىندا ولگا رىپاكوۆا سىمباتى مەن سپورتتىق قاسيەتىن ساقتاي وتىرىپ، ەكى رەت انا اتانىپ ۇلگەردى». ءدال ءسىز سەكىلدى ادامعا قاراپ بارشا قازاقستاننىڭ جاستارى بوي تۇزەيدى جانە ءسىز ارقىلى ناعىز ارميالىق سپورتتى بىلە باستايدى»، - دەدى قورعانىس ۆەدومستۆوسىنىڭ باسشىسى يمانعالي تاسماعامبەتوۆ. ق ر ق ك جوعارعى باس قولباسشىسىنىڭ اتىنان يمانعالي تاسماعامبەتوۆ سپورتشىعا «پاراسات» وردەنىن تابىس ەتتى. ودان باسقا، ريودا ءساتتى ونەر كورسەتكەنى ءۇشىن ولگا رىپاكوۆاعا مەرزىمىنەن بۇرىن كەزەكتى «مايور» اسكەري اتاعى بەرىلىپ، باعالى سىيلىقتار تابىستالدى.
«مەن بارشا قازاقستاندىقتارعا، نۇرسۇلتان ءابىش ۇلىنا، سىزگە، ا و س ك- نىڭ بارلىق باسشىلىعىنا العىسىمدى بىلدىرگىم كەلەدى. بارشالارىڭىز ماعان جانكۇيەر بولىپ، قولداۋ كورسەتتىڭىزدەر، كوپتەگەن ىزگى تىلەكتەر ايتىلدى. قازاقستان رەسپۋبليكاسىنا جانە سپورتقا قىزمەت ەتەمىن! مەن ءارى قاراي دا بارلىق الەمدىك ارەنالاردا ونەر كورسەتىپ، قازاقستاندىق سپورت پەن قازاقستاندىق ارميانىڭ ابىرويىن اسقاقتاتقىم كەلەدى»، - دەپ ولگا رىپاكوۆا رياسىز ريزاشىلىعىن ءبىلدىردى.
ق ر قورعانىس مينيسترلىگى ارميا ورتالىق سپورت كلۋبىنىڭ اسكەري قىزمەتشىسى ولگا رىپاكوۆا ريودا وتكەن وليمپيادادا ءۇش مارتە سەكىرۋدە 14,74 مەتر ناتيجە كورسەتتى. بۇل ونىڭ ماۋسىمداعى ۇزدىك جەكە ناتيجەسى بولدى. ولگا رىپاكوۆا قاشىقتىققا سەكىرۋدە 2010-جىلعى الەم چەمپيونى، ءۇش مارتە سەكىرۋ مەن جەتى سايىستا ازيا ويىندارىنىڭ ەكى دۇركىن چەمپيونى، بانگكوكتا (تايلاند) وتكەن ءۇش مارتە سەكىرۋدە 2007-جىلعى ۋنيۆەرسيادا چەمپيونى، ەڭبەك سىڭىرگەن سپورت شەبەرى بولىپ تابىلادى. ريو-دە-جانەيرودا وتكەن وليمپياداداعى قولا مەدال ول ءۇشىن مانساپ جولىنداعى ەكىنشى وليمپيادالىق مەدال بولعانىن ايتا كەتەيىك. لوندوندا وتكەن وليمپيادادا ول التىن مەدال يەگەرى اتانعان بولاتىن. ودان باسقا، شۆەيتساريالىق لوزاننا قالاسىندا وتكەن جەڭىل اتلەتيكادان «گاۋھار وداعى» حالىقارالىق تۋرنيرىنىڭ كۇمىس جۇلدەگەرى اتاندى.
ولگا رىپاكوۆا ق ر ق م ارميا ورتالىق سپورت كلۋبىندا 2006-جىلدان باستاپ قىزمەت ەتەدى. بۇل ۋاقىت ارالىعىندا ول بارىس وردەنىمەن، «قازاقستان رەسپۋبليكاسىنىڭ قارۋلى كۇشتەرىنە 20 جىل» مەدالىمەن، قازاقستان رەسپۋبليكاسىنىڭ «ەڭبەك سىڭىرگەن سپورت شەبەرى» اتاعىمەن، سونداي-اق، «دەنە شىنىقتىرۋ، سپورت پەن تۋريزمدى دامىتۋداعى ەڭبەگى» قۇرمەت بەلگىسىمەن ماراپاتتالدى. قورعانىس ءمينيسترى دەنە دايارلىعى جەكە قۇرامنىڭ جاۋىنگەرلىك قابىلەتتىلىگىنىڭ نەگىزى بولىپ تابىلاتىنىن اتاپ ءوتتى. سول ءۇشىن قازىرگى كەزدە ا و س ك- دا جاۋىنگەردىڭ توزىمدىلىگىن ارتتىراتىن بارلىق تۇرلەر بويىنشا جاتتىقتىرۋ شەبەرلىگى باعدارلاماسىن ەنگىزۋ تەتىگى بەلسەندى تۇردە ازىرلەنۋدە.
بۇل جەڭىل اتلەتشىلەرىمىز ءۇشىن عانا ەمەس، سونىمەن بىرگە، جەكپە-جەكشىلەر، شاڭعىشىلار، بياتلونيستەر جانە وزگەلەر ءۇشىن ايرىقشا تاپسىرما. بۇگىنگى تاڭدا كلۋبتىڭ كوماندالىق قۇرامى ءبىرشاما كەڭەيتىلدى. ونىڭ باعدارلاماسىنا كۇش جۇكتەمەسى، ەرىك پەن شىدامدىلىقتى قاجەت ەتەتىن كەيبىر ۇلتتىق سپورت تۇرلەرى (كوكپار، اۋدارىسپاق) قوسىلدى. ولگا رىپاكوۆادان وزگە، قازىرگى وليمپيادا ويىندارىندا قازاقستاندىق قۇرامانىڭ قۇرامىندا قازاقستان رەسپۋبليكاسى قورعانىس مينيسترلىگى ارميا ورتالىق سپورت كلۋبىنىڭ تاعى 9 سپورتشىسى ۇسىنىلدى. ول جەڭىل اتلەتشى قاتارداعى جاۋىنگەر ميحايل كراسيلوۆ، بىلعارى قولعاپ شەبەرلەرى اعا سەرجانت ءبىرجان جاقىپوۆ، ەفرەيتور قايرات ەراليەۆ جانە ق ر ق ك- ءنىڭ قىزمەتكەرى جانىبەك ءالىمحان ۇلى، ق ر ق م ا و س ك- نىڭ سپورتشىسى يۋري يۋركوۆ - وق اتۋ، 3-سىنىپتى سەرجانت ەۆگەني الەكسەيەۆ - بايداركالاردا ەسۋ، كىشى سەرجانت عالىمجان ۇسەربايەۆ - ەركىن كۇرەس، ەفرەيتور رۋسلان جاپاروۆ - تاەكۆوندو جانە ق ر ق ك- ءنىڭ قىزمەتكەرى ەلەنا پوتاپەنكو - زاماناۋي بەس سايىس.
