يسلام كاريموۆتىڭ جاعدايى بەلگىسىز كۇيدە قالىپ تۇر
30 - تامىزدا «فەرعانا» اگەنتتىگى اتى- ءجونى اتالماعان دەرەككوزىنە سىلتەمە جاساپ يسلام كاريموۆتىڭ «قايتىس بولعانىن» حابارلاعان. ال وزگە اقپارات قۇرالدارى، ونىڭ ىشىندە رەسەيلىك «ينتەرفاكس» اگەنتتىگى ونىڭ ءتىرى ەكەنىن حابارلاعان. رەسەي پرەزيدەنتى ۆلاديمير پۋتيننىڭ باسپا ءسوز حاتشىسى دميتري پەسكوۆ 30 -تامىزدا كرەمل كاريموۆتىڭ دەنساۋلىعىنا قاتىستى «جاڭا اقپارات الماعانىن» جانە ماسكەۋ ءۇشىن وزبەك پرەزيدەنتىنىڭ دەنساۋلىعىنا قاتىستى پىكىر بەرۋ « ءجونسىز بولاتىنىن» مالىمدەگەن.
وزبەكستاننىڭ مينيسترلەر كابينەتى 28 - تامىزدا يسلام كاريموۆتىڭ اۋرۋحاناعا تۇسكەنىن راستاعان. وزبەكستان مينيسترلەر كابينەتى تاراتقان بۇل حابار كاريموۆتىڭ دەنساۋلىعى تۋرالى العاشقى رەسمي حابار بولدى. حابارلامادا وزبەك پرەزيدەنتىنىڭ دارىگەرلەرگە قارالىپ جاتقانى ايتىلىپ، ول اقپارات تۇڭعىش رەت جەرگىلىكتى تەلەارنادان بەرىلدى. دارىگەر ونى «تەكسەرۋ مەن ەمدەۋ ءبىراز ۋاقىتقا سوزىلارىن» ايتقان.
ال 29 - تامىزدا كاريموۆتىڭ كىشى قىزى لولا كاريموۆا- تيلليايەۆا Instagram-دا اكەسىنە قاتىستى «سەنبى كۇنى تاڭەرتەڭ ميىنا قان قۇيىلعاندىقتان اۋرۋحاناعا ءتۇسىپ، قازىر جانساقتاۋ بولىمىندە جاتىر. جاعدايى تۇراقتى. قازىر ونىڭ الداعى احۋالىنا قاتىستى بولجام ايتۋعا ءالى ەرتە» دەپ جازعان.
يسلام كاريموۆ 1- قىركۇيەكتە وزبەكستان تاۋەلسىزدىگىنىڭ 25 جىلدىعىنا ارنالعان سالتاناتتى شارالاردا ەل الدىنا شىعادى دەپ جوسپارلانعان.
78 جاستاعى يسلام كاريموۆ وزبەكستاندى 1989 -جىلدان - وزبەك س س ر كوممۋنيستىك پارتياسى ورتالىق كوميتەتىنىڭ ءبىرىنشى حاتشىسى بولعان كەزدەن بەرى باسقارىپ كەلەدى. ول 1990 -جىلى وزبەك س س ر- ىنىڭ، ال 1991 -جىلى وزبەكستاننىڭ پرەزيدەنتى بولىپ سايلانعان. يسلام كاريموۆ بەس رەت پرەزيدەنت سايلاۋىنا تۇسكەن. ەلدەگى سوڭعى پرەزيدەنتى سايلاۋى 2015 -جىلى وتكەن.
