ءبارى دە ەرلەر جايىندا
«شاشىڭدى باسقا تۇسكە بوياساڭ دا بايقاماي قالادى، ونىڭ ۇستىنە «وتە جاقسى جاراسىپ تۇر» دەپ، وتىرىك الداي سالادى. ولار - ەرلەر».
«تاڭەرتەڭ ويانعاندا ونى وتە جاقسى كورەسىڭ. سودان سوڭ ول بىرنەشە ۋاقىت بويى حابارلاسپايدى... ودان اينىپ قالاسىڭ. كەيىن قايتا حابارلاسقان كەزىندە... ەندىگى باسقانى سۇيەسىڭ. ولار - ەركەكتەر».
«ولار سەگىزىنشى ناۋرىزعا نە سىيلايتىنىن بولجاپ بولمايسىز. سەبەبى مەرەكە ەكەنى ەندى ەسىنە تۇسكەن كەزىندە، تۇنگى ساعات ون بىردە دۇكەندە نە ساتىلاتىنىنا قيالىڭىز دا جەتپەيدى. ولار - ەركەكتەر».
«ولار ءبىزدىڭ ومىرىمىزدەگى كۇن سەكىلدى. شەكتەن تىس شاپاعىن شاشسا، قۇتىلۋعا اسىعامىز. بەتىن بۇلت باسقان سايىن نە نۇرى ازايعان سايىن ءار ساۋلەسىن زارىعا اڭسايمىز. ولار - ەركەكتەر».
«جىگىتىڭ مەيرامحاناعا الىپ بارعانىن قالاساڭ، كەز كەلگەن كۇنى ءبىزدىڭ باس قوسقانىمىزعا بالەن ۋاقىت بولدى دەپ ايتۋعا بولادى. سەبەبى ولار ءبارىبىر اتاۋلى كۇندى ەسىندە ساقتامايدى. ولار - ەركەكتەر».
نازىك جاندىلار وسىلاي قىسقا قاعىتپا قالجىڭمەن ەرلەردى سيپاتتاۋىمەن كرەاتيۆتى تۇردە باستالاتىن كومەديا فيلم سوڭىنا دەيىن كورەرمەنىن كۇلدىرۋدى توقتاتپادى.
«نازىك ەمەس جاندىلار» بارلىعى «ەر» دەگەن جۇگى اۋىر اتتى ارقالاپ جۇرگەنىمەن، ءبارى بىردەي بۇل اتاۋعا لايىق بولۋ-بولماۋىن ءار ءتۇرلى ەر ادام تيپىندە كورسەتەتىن بۇل فيلم رەجيسسەرلەرى: ميحايل جەرنيەۆسكي، لەونيد مارگولين. رەسەي ەلىنەن شىققان فيلمدە دميتري ناگيەۆ، اننا حيلكيەۆيچ، يگور ۆەرنيك، سەرگەي بەلوگولوۆتسيەۆ، گرانت توحاتيان، ۆلاديمير ەپيفانتسيەۆ، ەكاتەرينا سكۋلكينا، ەلەنا بورشيەۆا، ۆيكتور ستەپانيان، يان تساپنيك اتتى اكتەرلەر باستى رولدەردى سومدايدى.
قىرىق جاستاعى ەركەك پەن جيىرما جاستاعى قىز اراسىندا ماحاببات بولا ما؟
ەرلەر ايەلىن دەگەنىنە كوندىرۋ جولىندا قانداي قادامدارعا بارادى؟
اكەسى ءوز قولىمەن دايىنداعان ادجيكا مەن بالاسى جۇلدىز بولۋى اراسىندا قانداي بايلانىس بار؟
كۇيەۋ بالاسى مەن قايىن اتاسى ءازىلى جاراسۋى ءۇشىن ورتاق قىزىعۋشىلىق بولۋى قانشالىقتى ماڭىزدى؟
وسى سۇراقتاردىڭ بارلىعىنا كۇزدى كۇلدىرۋمەن باستايتىن فيلمنىڭ جاۋابى دايىن. كەز كەلگەن كليەنتىنە قاتىستىرىپ ەرتەگى قۇراستىراتىن تاكسيست جىگىتكە كەزىككەن ەركەكتەردىڭ باسىنان وتكەن ءارتۇرلى جايلار ءبىر فيلم جەلىسىندە توعىسادى، قۇرىلىسى وتە جاقسى ويلاستىرىلعان. سەناريىن ساريك اندرەاسيان، لەونيد مارگولين، دميتري پرەسنەتسوۆ، ياروسلاۆ لۋكاشيەۆيچ، ارتەم ەفيموۆ بىرلەسە جازعان.
1- قىركۇيەكتەن باستاپ ەلىمىزدىڭ بارلىق كينوتەاترىنان كورسەتىلەتىن «ءبارى دە ەرلەر جايىندا» اتتى كومەديانى كورگەن دە ارماندا، كورمەگەن دە ارماندا.
