بىشكەكتەگى قازاقستان ەلشىلىگىندە پوليتسيا باقىلاۋى كۇشەيتىلدى

بىشكەك. قازاقپارات - قىتاي ەلشىلىگى ماڭىندا بولعان جارىلىستان سوڭ بىشكەكتە ديپلوماتيالىق وكىلدىكتەر مەن مەملەكەتتىك ۆەدومستۆولاردا قاۋىپسىزدىك شارالارى كۇشەيتىلدى.

قىرعىزستانداعى قازاقستان ەلشىلىگىنەن حابارلاعانداي، ەلشىلىكتە پوليتسيا باقىلاۋى كۇشەيتىلگەن، سونداي-اق ديپميسيانىڭ اۋماعىن سانكتسيالانباعان كىرۋدەن قورعۋ ءۇشىن قاقپالاردىڭ الدىنا مەتالل كونسترۋكتسيالار (انتيتاران) ورناتىلدى.

كەشە ساعات 9.30 دا بىشكەكتە ورنالاسقان قىتاي ەلشىلىگى ماڭىندا جارىلىس بولدى. الدىن الا مالىمەتتەر بويىنشا، قۇقىق قورعاۋ ورگاندارى وقيعانى تەراكت بولۋى مۇمكىن ەكەندىگىن اتاپ ءوتتى. مەكەمەنىڭ باتىس قاقپاسىن بۇزىپ كىرگىسى كەلگەن Mitsubishi Delica كولىگى جارىلعان.

جارىلىس سالدارىنان اۆتوكولىكتە بولعان جۇرگىزۋشى قازا تاپقان جانە 3 ادام زارداپ شەككەن. جۇرگىزۋشىنىڭ اتى-ءجونى انىقتالۋدا. ديپلوماتتاردىڭ ەشقايسىسى زارداپ شەككەن جوق.

وقيعا ورنىندا قىرعىزستان ۇلتتىق قاۋىپسىزدىك مەملەكەتتىك كوميتەتى لاڭكەستىككە قارسى ورتالىق قىزمەتكەرلەرى جۇمىس ىستەپ جاتىر.