02:37, 31 - تامىز 2016 | GMT +5
ەردوعان: سيريادا اسكەري وپەراتسيا وتكىزە بەرەمىز
استانا. قازاقپارات - تۇركيا پرەزيدەنتى رەجەپ تايىپ ەردوعان «يسلام مەملەكەتى» (ي م) ەكسترەميستىك توبى مەن كۇرد جاساقتارى تۇرىك ازاماتتارىنا «قاۋىپ ءتوندىرۋىن قويعانشا» انكارانىڭ سيرياداعى اسكەري وپەراتسيانى جۇرگىزە بەرەتىنىن مالىمدەدى.
29 - تامىز كۇنى ا ق ش سيريانىڭ سولتۇستىگىندە تۇرىك اسكەرى مەن كۇرد جاساقتارى قاقتىعىسىپ قالعانىنا نارازى بولعان. پەنتاگون ي م سودىرلارى جوق اۋماقتا اسكەري ارەكەت بولۋى الاڭداتاتىن جايت ەكەنىن ايتقان. اق ءۇي دەرەگىنشە، ا ق ش پرەزيدەنتى باراك وباما مۇنى 4 - قىركۇيەكتە «ۇلكەن جيىرمالىق» سامميتى قارساڭىندا تۇرىك ارىپتەسىمەن تالقىلاماق.
تۇرىك اسكەرى وتكەن اپتادا سيريا شەكاراسىن كەسىپ ءوتىپ، وزدەرى تەرروريست دەپ تانيتىن كۇرد جاساقتارىمەن قاقتىعىسقان. ولار سيريا ازات ەتۋ ارمياسى جاساقتارىمەن بىرىگىپ، ي م- ءدى دجەرابلۋس قالاسىنان ىعىستىرىپ، ا ق ش قولدايتىن، قۇرامىندا كۇردتەر كوپ سيريا دەموكراتيالىق كۇشتەرىنە شابۋىل جاساعان.
«ازاتتىق» سايتى
