15:05, 30 - تامىز 2016 | GMT +5
ساپاربايەۆ ساحنادان كورىنبەي كەتكەن نۇرلان ونەربايەۆپەن بىرگە ءان سالدى -فوتو
استانا. قازاقپارات - اقتوبەدە العاش رەت «ءان- عۇمىر» رەترو فەستيۆالى ءوتتى. وندا ءانىنىڭ اسەم سازى مەن ولەڭىنىڭ ءسوزى تالاي جۇرەكتەردى تەبىرەنتكەن اندەر شىرقالدى.
فەستيۆال نۇرعيسا تىلەنديەۆ، ءشامشى قالداياقوۆ، اسەت بەيسەۋوۆتەردىڭ شىعارمالارىنا ارنالدى، دەپ حابارلايدى Aktobenews.kz.
«قالامىزدا العاش رەت وتكىزىلىپ جاتقان بايقاۋ وبلىس اكىمى بەردىبەك ساپاربايەۆتىڭ تاپسىرماسى اياسىندا ۇيىمداستىرىلدى. مۇنداعى ماقسات - عۇمىرلى اندەردى جاستاردىڭ ساناسىنا ءسىڭىرىپ، ونەرىمىزدى بيىكتەتۋ»، - دەيدى وبلىستىق مادەنيەت، قۇجاتتاما جانە مۇراعاتتار باسقارماسىنىڭ باسشىسى قانات ايتبايەۆ.
كەش سوڭىندا وبلىس اكىمى بەردىبەك ساپاربايەۆ ساحنا تورىنە شىعىپ، نۇرلان ونەربايەۆپەن بىرگە «قۇستار» ءانىن شىرقاپ، ونەر ادامدارىنا اقتوبە جۇرتشىلىعىنا مەرەكەلىك كوڭىل سىيلاعاندارى ءۇشىن العىسىن ءبىلدىردى.
سونداي- اق، سول كۇنى نەكەلەرىن قيعىزىپ، ساياباقتا سەرۋەندەپ جۇرگەن جاس جۇبايلار وبلىس اكىمىن كورە سالا، باتا سۇرادى. جاس وتاۋ يەلەرىنە باقىتتى عۇمىر تىلەگەن اكىم ولارمەن ەستەلىك سۋرەتكە ءتۇستى.
