ولگا رىپاكوۆا: ۇيگە قايتار جول وتە ۇزاق بولدى

 وسكەمەن. قازاقپارات - ۇيگە قايتار جول وتە ۇزاق بولدى، دەدى لوندونداعى وليمپيادا ويىندارىنىڭ چەمپيونى جانە ريو- دە- جانەيروداعى ويىنداردىڭ قولا جۇلدەگەرى ولگا رىپاكوۆا.

«شىعىس قازاقستاندىق سپورتشىلاردىڭ جەتىستىكتەرى سەندەردەي جاس سپورتشىلاردى بيىك شىڭداردى باعىندىرۋعا ىنتالاندىرا تۇسەدى دەپ ۇمىتتەنەمىن. وزدەرىڭە سەنىڭدەر، وزدەرىڭ قالاعان سپورت ءتۇرىن سۇيىڭدەر، سوندا ساتتىلىك پەن جەتىستىك سەندەردەن الىستامايدى»، - دەدى و. رىپاكوۆا مەتاللۋرگتەر سارايىنداعى الاڭ الدىندا جاس سپورتشىلارمەن كەزدەسۋدە. - ريودان كەيىن مەن تاعى دا بايقاۋلارعا قاتىستىم، قايتار جول سونداي ۇزاق بولدى، وتانىما جەتكەنشە اسىقتىم».

جانكۇيەرلەرمەن بىرگە وليمپيادا چەمپيونىن تۋىستارى مەن جاقىندارى، اناسى مەن ءۇش جاسار ۇلى دا كۇتىپ الدى.

ايتا كەتەيىك، جازعى ريوداعى وليمپيادا ويىندارىندا ەلىمىزدىڭ نامىسىن قورعايتىن 104 سپورتشىنىڭ التاۋى شىعىس قازاقستان وبلىسىنان اتتاندى. ەڭ جوعارى كورسەتكىشتى كورسەتكەن ولگا رىپاكوۆا ەلىمىزدىڭ قورجىنىن قولا مەدالمەن تولتىردى. ءتورت جىل بۇرىن لوندونداعى وليمپيادا ويىندارىندا ولگا التىن مەدال جەڭىپ العان ەدى. قازاقستان پرەزيدەنتى نۇرسۇلتان نازاربايەۆ ولگا رىپاكوۆانى جەڭىسىمەن قۇتتىقتاپ، «ونىڭ قولا جۇلدەسىنىڭ التىنعا تاتيتىنىن، ونىڭ سپورتشى عانا ەمەس، باتىر انا ەكەنىن» اتاپ ءوتتى.

 وليمپياداشىلاردىڭ وتانعا ورالۋىنا وراي ۇيىمداستىرىلاتىن باستى شارا تۇسكەن كەيىن رەسپۋبليكا الاڭىندا باستالادى. وندا ق ر كونستيتۋتسيا كۇنىنە وراي، وليمپياداشىلار قاتىسقان مەرەكەلىك كەش وتەدى.