وزبەكستاندا بولاشاق تاق يەگەرى بولۋى مۇمكىن ەسىمدەر اتالا باستادى
وزبەك باسشىسىنىڭ كىشى قىزى لولا كاريموۆا.
فوتو: FERGANANEWS. COM
وزبەكتىڭ بەلگىلى ساياسي ساراپشىلارى قازىردىڭ وزىندە ەل تۇتقاسىن ۇستايتىن ءبىرقاتار ەسىمدەردى اتاپ قويدى. ەڭ الدىمەن وزبەك باسشىسىنىڭ كىشى قىزى لولا كاريموۆانىڭ اتى اتالىپ وتىر. ويتكەنى، تاشكەنتتەگى وكساراي رەزيدەنسياسىندا وتكەن ءبىر جيىندا يسلام كاريموۆتىڭ ءوزى لولانى ءىزباسار ەتكىسى كەلەتىنىن مالىمدەپتى- مىس.
ودان بولەك، ساياسي سالماعى جونىنەن ۇكىمەت باسشىسى شاۆكات ميرزيايەۆتىڭ اتى وزىپ تۇر. ول 2003 -جىلى پرەزيدەنت كاريموۆتىڭ ۇسىنىسىمەن پرەمەرلىككە كەلگەن بولاتىن. الايدا زاڭ بويىنشا سەنات ءتوراعاسى نيگماتۋللا يۋلداشيەۆتىڭ دا پرەزيدەنت بولۋ مۇمكىندىگى بار.
شاۆكات ميرزيايەۆ
ال وتكەن سەنبى كۇنى اۋرۋحاناعا جەتكىزىلگەن پرەزيدەنت يسلام كاريموۆتىڭ حال- جاعدايى الداعى بەس كۇن ىشىندە جاريا ەتىلمەك.
ەسكە سالا كەتسەك، وزبەكستاندىق باق يسلام كاريموۆتىڭ قايتىس بولعانى جايلى اقپارات تاراتقان بولاتىن. ال ازىرگە رەسمي بيلىك وزبەكستان كوشباسشىسىنىڭ قازا بولعانى جايلى حاباردى جوققا شىعارۋدا. وزبەكستان پرەزيدەنتى يسلام كاريموۆ ءالى اۋرۋحانادا جاتىر. ونىڭ جاعدايى تۇراقتى. وزبەك كوشباسشىسىنىڭ ءولىمى جايلى حابار شىندىققا سايكەس كەلمەيدى دەپ حابارلايدى پرەزيدەنت اپپاراتىنداعى دەرەككوزگە سلىتەمە جاساپ ر ي ا نوۆوستي.
وزبەكستان حالىق قوزعالىسى وپپوزيتسيالىق ۇيىمىنداعىلاردىڭ ايتۋىنشا، 78 جاستاعى پرەزيدەنت ۇلتتىق وليمپيالىق قۇراماعا قۇرمەت كورسەتۋگە ارنالعان بانكەت كەزىندە ءوزىن ناشار سەزىنگەن. سالتاناتتى شارا 26 - تامىز كۇنى كەشكە پرەزيدەنتتىڭ دۇرمەندەگى رەزيدەنسياسىندا ءوتىپ جاتقان. بانكەتكە مەملەكەت باسشىسىنا جاقىن شەنەۋنىكتەر قاتىسقان. سپورتشىلاردىڭ تابىسىنا قۋانعان كارىموۆ ءسپيرتتى ىشىمدىك ءىشىپ قويعان. سول كۇنى ءتۇن جارىمىندا ونىڭ ءوز اكىمشىلىگىنىڭ باسشىسى زەليمحان حايداروۆپەن اڭگىمەلەسىپ وتىرعانى دا بەلگىلى بولعان. سوسىن كەنەت ەس- ءتۇسسىز جەرگە قۇلاپ قالعان.
وزبەك وپپوزيتسيونەرلەرىنىڭ مالىمەتىنشە، كارىموۆكە ءبىرىنشى مەديتسينالىق كومەكتى رەزيدەنسياداعى كەزەكشى دارىگەرلەر كورسەتكەن. وسىدان كەيىن اۋرۋحانانىڭ جانساقتاۋ بولىمىنە جەتكىزىلگەن.
ال وزبەكستان پرەزيدەنتى يسلام كاريموۆتىڭ كەنجە قىزى لولا كاريموۆا- تيلليايەۆا مەملەكەت باسشىسىنىڭ ميىنا قان قۇيىلعانىن مالىمدەدى.
ول بۇل تۋرالى ءوزىنىڭ Facebook-تاعى پاراقشاسىنا جازبا قالدىردى.
«الىپ- قاشپا اڭگىمەلەردىڭ تاراپ كەتۋىن بولدىرماۋ ءۇشىن ءوز پاراقشامدا سىزدەرمەن وتباسىمىزدا ورىن العان اۋىر جاعدايدى بولىسپەكشىمىن. سەنبى كۇنى تاڭەرتەڭ ميىنا قان كەتۋىنە بايلانىستى اكەم اۋرۋحانانىڭ جانساقتاۋ بولىمىنە جەتكىزىلدى. ونىڭ جاعدايى تۇراقتى دەپ باعالانۋدا. قازىر قانداي دا ءبىر بولجام ايتۋعا ەرتە. حالىقتان ءارتۇرلى قاۋەسەتكە جول بەرمەي، وتباسىمىزدىڭ قۇقىعىنا قۇرمەتپەن قاراۋدى ءوتىنىپ سۇرايمىن. اكەمنىڭ اماندىعىن تىلەپ دۇعا ەتكەندەرگە الدىن الا العىس بىلدىرەمىن»، - دەپ جازدى لولا كاريموۆا- تيلليايەۆا.
يسلام كاريموۆ الدىمىزداعى 1- قىركۇيەكتە وزبەكستان تاۋەلسىزدىگىنىڭ 25 جىلدىعىنا ارنالعان سالتاناتتى شارالاردا كوپ الدىنا شىعادى دەپ جوسپارلانعان بولاتىن.
www.nur.kz/kk
