ساراپشى: يسلام كارىموۆ بيلىكتەن كەتكەن جاعدايدا وزبەكستاننىڭ سىرتقى ساياساتىندا ەشتەڭە وزگەرمەيدى
بۇگىن «قازاقپارات» تىلشىسىنە بەرگەن سۇحباتىندا قازاقستاننىڭ ستراتەگيالىق زەرتتەۋلەر ينستيتۋتىنىڭ بۇرىنعى ديرەكتورى، ساياساتكەر بولات سۇلتانوۆ وسىنداي پىكىر ءبىلدىردى.
«يسلام ءابدۋعاني ۇلى كارىموۆتىڭ ايىعىپ كەتۋىنە تىلەكتەسپىز. ءبىراق، ىشكى جانە سىرتقى ساياساتتىڭ بارىسى قانداي دا ءبىر دارەجەدە ەل تىزگىنەن ۇستاعان تۇلعالاردىڭ دەنساۋلىعىنا بايلانىستى بولاتىنى بەلگىلى. سوندىقتان، وزبەكستان پرەزيدەنتىنىڭ اۋرۋحاناعا جاتقىزىلعانى تۋرالى اقپاراتقا بايلانىستى قاۋەسەتتەر كوبەيىپ كەتتى. ويتكەنى، ادەتتەگىدەي بىلەتىندەر ۇندەمەيدى، ال بىلمەيتىندەر قاۋەسەت تاراتىپ، جالعان پىكىر قالىپتاستىرادى. سوندىقتان، وزبەكستان تاريحىنداعى بۇل كەزەكتى وقيعانىڭ قالاي اياقتالاتىنى تۋرالى ناقتى بىردەڭە دەۋ قيىن»، - دەدى ب. سۇلتانوۆ.
ونىڭ پىكىرىنشە، وزبەكستان - ورتالىق ازيا وڭىرىندە ماڭىزدى مەملەكەتتەردىڭ ءبىرى.
«قازىر، وزبەكستانداعى بيلىك مۇراگەرلىگىنە قاتىستى ەكى پىكىر بار. ءبىرى وزبەكستاندا پرەمەر- مينيستر شاۆكات ميرزيايەۆتىڭ ەل تىزگىنىن ۇستايتىندىعى جايلى بولسا، ەكىنشىسى پرەزيدەنتتىڭ قىزى گۇلنار كارىموۆانىڭ بيلىككە كەلەتىندىگى جايلى. دەيتۇرعانمەن، ول بيلىكتىڭ مۇراگەرلىگىنەن الاستاتىلعان. ءبىراق، ورتالىق ازيادا ءومىر سۇرەمىز عوي. سوندىقتان، بارلىعى وزگەرۋى مۇمكىن»، - دەدى ساراپشى.
ونىڭ پىكىرىنشە، قازىرگى جاعدايدا بولجام جاساۋ وتە قيىن.
«بۇل شىعىس قوي. ءبىرىنشى قىركۇيەككە دەيىن قانداي دا ءبىر بولجام جاساۋ وتە قيىن. ويتكەنى، 1 -قىركۇيەك - وزبەكستاننىڭ تاۋەلسىزدىك كۇنى»، - دەدى ساياساتكەر.
سونىمەن قاتار، ول ەلدىڭ اماندىعى، قاۋىپسىزدىگى ءبىر ادامنىڭ دەنساۋلىعىنا تاۋەلدى بولا المايتىندىعىن ايتتى.
«وزبەكستاننىڭ سىرتقى ساياساتىندا ەشتەڭە وزگەرمەيدى. ويتكەنى، ورتالىق ازيانىڭ باسقا دا ەلدەرى سەكىلدى رەسەي مەن قىتاي جانە يسلام الەمى اراسىندا ورنالاسقان. ءبىراق، قانداي دا ءبىر تاكتيكالىق وزگەرىستەر ورىن الۋى مۇمكىن»، - دەدى ول.
ونىڭ پىكىرىنشە، قازاق- وزبەك قارىم- قاتىناسى دوستىق سيپاتتا قالا بەرمەك.
«قازاقستان مەن وزبەكستان ورتالىق ازيادا كوشباسشىلىققا تالاسىپ جاتىر» دەگەن پىكىر ءجيى ايتىلادى. مۇنىڭ بارلىعى بەكەر ءسوز»، - دەدى ب. سۇلتانوۆ.
ال، وزبەكستان پرەزيدەنتىنىڭ باسپا ءسوز قىزمەتىندە يسلام كارىموۆتىڭ دەنساۋلىعىنا قاتىستى جاڭا دەرەكتەر ايتىلعان جوق.
ەستەرىڭىزگە سالا كەتەلىك، 78 جاستاعى وزبەكستان پرەزيدەنتى يسلام كارىموۆ اۋرۋحاناعا جاتقىزىلدى. بۇل تۋرالى تۇڭعىش رەت رەسمي تۇردە حابارلاندى.
مينيسترلەر كابينەتىنىڭ حابارلاۋىنشا، مەديتسينالىق تەكسەرۋ جۇرگىزۋگە جانە ەمدەلۋگە بەلگىلى ءبىر ۋاقىت كەرەك».
اۆتور: ايبوتا جاپپاربەرگەن
