دميتري بالاندين سىيعا العان اۆتوكولىگىن اكەسىنە بەرەدى

الماتى. قازاقپارات - سۋعا جۇزۋدەن ريو وليمپياداسىنىڭ چەمپيونى، دميتري بالاندين الماتى اكىمدىگى اتىنان سىيعا العان اۆتوكولىگىن اكەسىنە بەرەدى.

بۇگىن الماتى اكىمى باۋىرجان بايبەك سپورتشىعا المالى اۋدانىندا ورنالاسقان كوپقاباتتى جاڭا تۇرعىن ۇيدەن ءۇش قاباتتى پاتەر مەن

«بانك ربك» ا ق اتىنان «Toyota Land Cruiser-200» اۆتوكولىگىنىڭ كىلتىن تابىس ەتكەن بولاتىن.

«ماشينانى اكەمە تارتۋ ەتۋدى جوسپارلاپ قويدىم. ماعان مۇنداي ۇلكەن ماشيناعا وتىرۋعا ءالى ەرتەلەۋ. ال مىنا جاڭا پاتەردە تۇراتىن بولامىن. كەڭ، سونداي ىڭعايلى پاتەر ەكەن. ءارى تىنىش اۋداننان»، - دەدى د. بالاندين.

سونداي-اق، ول الداعى جوسپارلارىمەن ءبولىستى.

«الداعى ۋاقىتتا جاتتىعاتىن بولامىن. ءالى ناقتى جوسپار قۇرعان جوقپىن. جاتتىقتىرۋشىلارمەن بىرگە تالقىلاۋ كەرەك. جاقىن ۋاقىتتاعى جوسپار - الداعى جىلى بولاتىن الەم بىرىنشىلىگى. تۇپكى ماقسات - توكيو وليمپياداسى»، - دەدى سپورتشى.

سونىمەن قاتار، بۇگىن بوكستان ريو وليمپياداسىنىڭ قولا جۇلدەگەرى داريعا شاكىموۆاعا قالا اكىمى مەدەۋ اۋدانىنان ءبىر بولمەلى پاتەر كىلتى مەن جەكە كاسىپكەر سىيلاعان «Toyota Land Cruiser Prado»  كولىگىن تارتۋ ەتتى.

اۆتور: ايبوتا جاپپاربەرگەن