نازاربايەۆ: ەلدىڭ تابىستى دامۋىنىڭ كەپىلى - كونستيتۋتسيانى مۇلتىكسىز ورىنداۋ
قۇتتىقتاۋ حاتىن ەلىمىزدىڭ مەملەكەتتىك حاتشىسى گۇلشارا ءابدىقالىقوۆا وقىپ بەردى.
«قۇرمەتتى دوستار! ق ر كونستيتۋتسياسى كۇنىنە ارنالعان حالىقارالىق كونفەرەنسيا ەلىمىزدىڭ تاۋەلسىزدىگىنىڭ 25 جىلدىعىن مەرەكەلەۋ جىلىندا وتۋدە. قازاقستان شيرەك عاسىردىڭ ىشىندە ۇلتتاردىڭ الەمدىك وتباسىنىڭ لايىقتى قاتىسۋشىسىنا اينالدى. ەلدىڭ تابىستى دامۋىنىڭ نەگىزگى كوزى مەن كەپىلى - رەسپۋبليكالىق رەفەرەندۋمدا قابىلدانعان كونستيتۋتسيا ارىپتەرى مەن رۋحىن مۇلتىكسىز ورىنداۋ. نەگىزگى زاڭ نورمالارىنىڭ ارقاسىندا سەنىمدى ەكونوميكالىق ءوسىمدى، قازاقستاندىقتاردىڭ ءال- اۋقاتىنىڭ ارتۋىن، حالىقارالىق ارەناداعى ەل بەدەلىنىڭ كوتەرىلۋىن قامتاماسىز ەتەتىن تەرەڭ رەفورمالار جۇرگىزىلدى»، - دەلىنگەن ەلباسى قۇتتىقتاۋىندا.
سونىمەن قاتار مەملەكەت باسشىسى قازىرگى ۋاقىتتا قازاقستان وسى عاسىردىڭ ورتا شەنىندە الەمنىڭ دامىعان 30 ەلىنىڭ قاتارىنان ورىن الۋ سىندى ۇلى ماقساتتى الدىنا جۇكتەپ وتىرعاندىعىن اتاپ وتكەن. ونى جۇزەگە اسىرۋ ءۇشىن «نۇرلى جول» جاڭا ەكونوميكالىق ساياساتى، 5 ينستيتۋتتىق رەفورمانى جۇزەگە اسىرۋدىڭ ۇلت جوسپارى قولعا الىنعان.
«كونستيتۋتسيا بەكىتىلگەن قۇندىلىقتار «ماڭگىلىك ەل» پاتريوتتىق اكتىسىندە دە كورىنىس تاپقان. قوعام مەن مەملەكەتتىك بىرلەسكەن كۇش- جىگەرى كونستيتۋتسيا الەۋەتىن جان- جاقتى اشۋعا باعىتتالعان. كونفەرەنسيا قاتىسۋشىلارىنىڭ عىلىمي يدەيالارى ەلدىڭ ودان ارى قۇقىقتىق دامۋىنا سەپتىگىن تيگىزەرىنە سەنىمدىمىن»، - دەپ اتاپ وتەدى مەملەكەت باسشىسى.
اۆتور: مارلان جيەمباي
