قازاقستان يادرولىق سىناقتان الەمدە ەشبىر مەملەكەت باستان كەشىرمەگەن زارداپتى شەكتى - نۇرسۇلتان نازاربايەۆ
بۇگىن استانادا ءوتىپ جاتقان «يادرولىق قارۋسىز الەم قۇرۋ» اتتى حالىقارالىق كونفەرەنتسيا بارىسىندا ءسوز سويلەگەن ق ر پرەزيدەنتى نۇرسۇلتان نازاربايەۆ وسىلاي مالىمدەدى.
«سەمەي پوليگونى ماڭىندا ءۇش ءجۇز مىڭ شارشى مەتر الاڭدا شامامەن جارتى ميلليون ادام تۇرعان بولاتىن. كەڭەستىك اسكەري باسشىلىقتىڭ قازاقستان اۋماعىندا پوليگون ورنالاستىرۋ تۋرالى قۇجاتتامىلىق نەگىزدەمەسىندە «بۇل جەرلەر ەلسىز» دەگەن قاتىگەزدىكپەن قورلانعان سوزدەر بار بولاتىن. پوليگون عانا ەمەس وعان ىرگەلەس جاتقان اۋماقتار دا قارقىندى راديواكتيۆتىك لاستانۋعا ۇشىرادى»، - دەدى ن. نازاربايەۆ كونفەرەنتسيادا سويلەگەن سوزىندە.
ەلباسىنىڭ ايتۋىنشا، يادرولىق سىناق سول ماڭداعى ادامدار مەن ءتىرى تابيعاتتىڭ ساۋلەلىك پاتولوگياعا ۇشىراۋىنا اكەپ سوقتىرعان. ال مامانداردىڭ باعالاۋى بويىنشا ساۋلەلەنۋگە ۇشىراعان ادامداردىڭ جالپى سانى بەس ءجۇز مىڭنان اسادى. سونىمەن قاتار، قازاقستاندىقتاردىڭ ءالى دە بىرنەشە ۇرپاعى دەنساۋلىقتارىندا اجال قۇشتىراتىن سىناقتاردىڭ اسەرى مەن سالدارىن سەزىنەتىن بولادى.
«قازاقستان مەن قازاقستاندىقتار يادرولىق سىناقتاردىڭ الەمدەگى ەشبىر مەملەكەت پەن حالىقتار باستان كەشىرمەگەن زيانىن شەكتى. سوندىقتان قازاقستان مەن جاپونيا يادرولىق قارۋدىڭ قاسىرەتىن، ونىڭ زارداپتارىن جاقسى تۇسىنەدى. ەكى مەملەكەتتىڭ يادرولىق قارۋعا تىيىم سالۋ تۋرالى باستامانى ۇدايى كوتەرىپ وتىراتىنى دا سوندىقتان. ءبىزدىڭ يادرولىق قارۋدان ازات ەلدى قۇرۋ تۋرالى تالپىنىسىمىز - ماڭگىلىك ەل جالپى ۇلتتىق يدەياسىنىڭ ماڭىزدى قۇرامى»، - دەدى ن. نازاربايەۆ.
اۆتور: قانات مامەتقازى ۇلى
