بيىل «ەۋرازيا بارىسى» تۋرنيرى العاش رەت «الماتى ارەنا» سپورت كەشەنىندە وتەدى
اتالعان تۋرنير قازاقستان تاۋەلسىزدىگىنىڭ 25 جىلدىعى مەن الماتى قالاسىنىڭ 1000 جىلدىعىنا ارنالادى. سايىسقا 8 ەلدەن، 130 قاتىسۋشى كەلەدى دەپ جوسپارلانعان.
ترانسلياتسيالار «قازسپورت» جانە «بوەتس» كانالدارىنان جۇرگىزىلەدى. «8 ەلدىڭ ەڭ مىقتى بالۋاندارى «ەۋرازيا بارىسى» اتانۋ ءۇشىن سايىسقا تۇسەدى. ءبىز، الماتى قالاسى ءوزىنىڭ 1000 جىلدىق تويىندا وسىنداي مارتەبەلى جارىستى قابىلدايتىنىنا قۋانىشتىمىز. سونداي-اق، بۇل جاڭا سپورت كەشەنى «الماتى ارەنادا» وتەتىن ەڭ ءبىرىنشى حالىقارالىق تۋرنير بولماق»، - دەدى الماتى قالالىق قازاق كۇرەسى فەدەراتسياسىنىڭ ۆيتسە-پرەزيدەنتى ماقسات قيقىموۆ.
«الماتى ارەنادا» «ەۋرازيا بارىسىن» وتكىزۋ اتالعان سپورت كەشەنىنىڭ الەۋەتىن بايقاپ كورۋگە مۇمكىندىك بەرمەك. ويتكەنى، بۇل سپورت نىسانىندا 2017-جىلدىڭ قاڭتار- اقپان ايىندا قىسقى ۋنيۆەرسيادا ويىندارىنىڭ اشىلۋ جانە جابىلۋ سالتاناتتارى مەن مانەرلەپ سىرعاناۋ جانە كەرلينگتەن سايىستار وتەدى. سونداي-اق، قىركۇيەك ايىنان باستاپ، «الماتى ارەنادا» قازاق كۇرەسىمەن اينالىسۋعا ارنالعان زال اشىلادى دەپ جوسپارلانعان. وندا كۇن سايىن، الماتى تۇرعىندارىنا ارناپ، اتالعان سپورت تۇرىنەن كۇندىزگى جانە كەشكى جاتتىعۋلار وتكىزىلەدى.
اۆتور: كۇنسۇلتان وتارباي
