ليۆيادان حيميالىق قارۋ شىعارىلدى

بۇل ەلدە جويقىن قارۋ جويىلۋى ءتيىس، دەپ جازادى 24.kz.

بۇل بىرىككەن ۇلتتار ۇيىمىنا قاراستى حيميالىق قارۋعا تىيىم سالۋ ۇيىمىنىڭ جۇزەگە اسىرىپ وتىرعان شاراسى.

ليۆيا 2004-جىلى حيميالىق قارۋىن جويۋعا كەلىسكەن بولاتىن. سول كەزدە وسى ەلدىڭ وكىمەتى 24,7 توننا يپريت گازى 1 مىڭ 390 توننا حيميالىق زاتتارى جانە 3 مىڭنان اسا بومباسى بار ەكەنىن جاريالاعان ەدى. 2011-جىلى مۋاممار قاددافي بيلىكتەن ايىرىلعاننان كەيىن، حيميالىق قارۋدى جويۋ ءىسى توقتاپ، ەلدە 850 توننا حيميالىق زات قالىپ قويدى.

بۇل جويقىن قارۋ ليۆيادا ارەكەت ەتىپ جۇرگەن ەكسترەميستىك توپتاردىڭ قولىنا ءتۇسۋ قاۋپى بولعاندىقتان، 22- شىلدەدە بىرىككەن ۇلتتار ۇيىمىنىڭ قاۋىپسىزدىك كەڭەسىندە قارۋدى ليۆيادان شىعارىپ، جويۋ جوسپارى قۇرىلعان بولاتىن. بۇل شارانى اتقارۋ دانياعا ۇسىنىلدى. وسى ەل 2014-جىلى سيريادان حيميالىق قارۋدى شىعارىپ-جويۋ ىسىندە نەگىزگى مىندەت اتقارعان ەدى.