قاراعاندى وبلىسىنىڭ اباي اۋدانىندا وقۋشىلار تەلەارناسى اشىلدى
ەندى جاڭا وقۋ جىلىنان باستاپ ءبىلىم وشاعىنىڭ جەتىستىكتەرى مەن باعدارلامالارى كوگىلدىر ەكراننان كورسەتىلە باستايدى.
مۇنىمەن قوسا، مەكتەپتە وقۋشىلارعا «تەحنيكالىق قۇراستىرۋ» جانە «3د فورماتىندا مودەلدەۋ» دەپ اتالاتىن قوسىمشا ساباقتار دا وتكىزىلەدى. جوبانى جۇزەگە اسىرۋعا 6 ميلليون 730 مىڭ تەڭگە جۇمسالعان. قوسىمشا ءبىلىم بەرۋ جۇيەسى اباي اۋدانىندا ەكى باعىتتا جۇزەگە اسىرىلادى. «تەحنيكالىق قۇراستىرۋ» ءادىسى بويىنشا وقۋشىلار تالابىن ۇشتايدى. ەكىنشى ءتاسىل ارقىلى وزات وقۋشىلار «3د فورماتىندا مودەلدەۋدىڭ» جولدارىن ۇيرەنەدى. ال وڭىردەگى №1 -مەكتەپتە بالالاردى عىلىم مەن تەحنيكانىڭ وزىق ۇلگىلەرىن تانىپ بىلۋگە باۋليتىن ارنايى كابينەت بار. مۇندا ولار قۇرالدارمەن جۇمىس جاساپ، ميكروسحەمالاردى ءبىر- بىرىمەن جالعاپ ۇيرەنەدى. بيجامال يۋسۋپوۆا، اباي قالالىق № 1 -قوسىمشا ءبىلىم بەرەتىن مەكتەپ- ورتالىعىنىڭ ديرەكتورى:
- بالالاردى جاڭا تەحنولوگيالارعا باۋليمىز. مونتاج جاساۋ، بەينە ءتۇسىرىلىم ادىستەرىنە ۇيرەتىپ جاتىرمىز. الداعى ۋاقىتتاردا مەكتەپتىڭ ۇزدىك دەگەن وقۋشىلارى تۋرالى ماتەريالدار جاساپ، كورسەتەمىز. بۇل باسقا وقۋشىلارعا سەپتىگىن تيگىزەدى.
مىنا كورشى كابينەتتە كەز- كەلگەن وقۋشى مودەلدەۋدىڭ قىر- سىرىنا قانىعىپ، جوباسىنىڭ سىزباسىن باسىپ شىعارا الادى. ءتىپتى شاكىرتتەر 3د فورماتىنداعى پرينتەردى دە وزدەرى قولدانىپ، تىڭ يدەيالارىن جۇزەگە اسىرادى. ءبىلىمىن شىڭدايمىن دەگەن بالاعا ورتالىقتىڭ ەسىگى ءاردايىم اشىق. سونىمەن قاتار اتالمىش مەكتەپ ابايداعى قاراپايىم كابينەتتى زاماناۋي تەلەستۋدياعا اينالدىرعان بىردەن-ءبىر ءبىلىم ورداسى. اياداي ارنانىڭ بەينەكامەراسى مەن ميكروفون، جارىق قوياتىن جابدىقتارى دا ساتىپ الىنعان. 8 بەن 11 -سىنىپ وقۋشىلارى اراسىنان ۇيىرمەگە قاتىسۋعا 120 ادام جازىلىپتى.
پولينا ماكەيەۆا، №14 مەكتەپ- ليتسەيىنىڭ وقۋشىسى:
- ءبىزدىڭ مەكتەپتەگى تەلەستۋديا زاماناۋي تەحنيكامەن جابدىقتالعان. جاڭا تەلەارنا اشىلعالى بەرى بىرنەشە روليكتەر ءتۇسىرىپ ۇلگەردىك. كەلەشەكتە تەلەارنانىڭ ۇزدىك مامانى بولعىم كەلەدى. ارمانىم جۇرگىزۋشى بولۋ.
باعدارلامالاردى بالالار وزدەرى تۇسىرەدى. مەكتەپتىڭ كۇندەلىكتى جاڭالىقتارىنان رەپورتاجدار دايىندايدى. مۋلتيپليكاتسيالىق فيلمدەر ازىرلەۋدىڭ قىر- سىرىن ۇيرەنەدى. جەتكىنشەكتەردىڭ جاڭالىقتارىن اۋدانعا قاراستى بارلىق مەكتەپتەر تاماشالايدى. جاڭا جوبا جاقىندا كوپشىلىككە تانىستىرىلادى.
www.24.kz
