جازيرا جاپپارقۇل وليمپيادا جۇلدەسى ءۇشىن العان اقشاسىن ءسىڭىلىسىنىڭ ەمىنە جۇمساماق

11 جاستاعى الفيا ەسىمدى ارۋ تسەرەبرالدى سال اۋرۋىمەن اۋىرادى ەكەن، دەپ جازادى massaget.kz.
ريو تورىندە كۇمىس مەدالدى يەمدەنگەن ارۋدىڭ جاقىندارىمەن تەلەفون ارقىلى تىلدەسكەن ءساتى وسىدان ءبىراز كۇن بۇرىن عالامتور بەتىنە شىققان بولاتىن. سول كەزدە، تولقىپ تۇرعان سپورتشىنىڭ "سەن ءۇشىن الدىم عوي" دەپ اعىنان جارىلىپ سويلەپ تۇرعان ءساتى تاسپاعا باسىلىپ قالعان ەكەن. اتالعان بەينەروليككە سپورتشىنىڭ ءوزى بىلاي دەپ جاۋاپ بەردى: "مەنىڭ ءسىڭىلىم سەرەبرالدى سال اۋرۋىمەن اۋىرادى. مەن ونىڭ ساۋىعىپ كەتكەنىن قالايمىن جانە سول ءۇشىن ايانباي تەر توگىپ ءجۇرمىن. ءسىڭىلىمدى ەمدەتۋ ءۇشىن قوماقتى قاراجات كەرەك. ەندى مەنىڭ ەنشىمدەگى اقشانىڭ بارلىعى الفيانىڭ ەمىنە جۇمسالادى. ال، موينىمداعى مەدالدى جانە ريوداعى جەڭىسىمدى ەلىمە ارنايمىن".
ەستەرىڭىزگە سالا كەتسەك، جازيرا جاپپارقۇل 11- تامىز كۇنى اۋىر اتلەتيكادان 69 كەلىگە دەيىنگى سالماقتا كۇمىس مەدالدى يەمدەنگەن ەدى. جازيرا قىتاي ەلىنىڭ سپورتشىسىنان جاراقاتىنا بايلانىستى ايلاسىن اسىرا الماعان ەكەن. بۇل تۋرالى جۋرناليستەر قاۋىمىنا ءوزى ايتىپ بەردى.