ىشكى ىستەر ءمينيسترى وليمپيادا جۇلدەگەرلەرىن ماراپاتتادى

ق ر ىشكى ىستەر ءمينيسترى «دينامو» دەنە-شىنىقتىرۋ-سپورت قوعامى قوعامدىق بىرلەستىگىنىڭ ءتوراعاسى قالمۇحانبەت قاسىموۆ ىشكى ىستەر مينيسترلىگى ۇجىمىنىڭ، «دينامو» د س ق ق ب، ق ر ۇلتتىق ۇلانى جانە جەكە ءوزىنىڭ اتىنان سپورتشى- ديناموشىلارعا العىسى مەن قۇرمەتىن ءبىلدىردى.
«ءبىزدىڭ قازاقستاندىق سپورتشى- ديناموشىلار ريو-دە-جانەيرودا اسقان شەبىرلىك پەن ۇزدىك ەرلىكتىڭ ۇلگىسىن كورسەتتى، ەلىمىز ءۇشىن زور ماقتانىش سەزىمىن جانە بارلىق الەمدەگى سپورتتى سۇيەتىن جانكۇيەرلەرگە قۋانىش سىيلادى. وليمپيادا-2016 بارىسىندا جەڭىپ العان مەدالداردىڭ بارلىعى دا ءوزىنىڭ وتكەن جىلى 90 جىلدىعىن اتاپ وتكەن «دينامو» سپورت قوعامىنىڭ اتىنان قازاقستان رەسپۋبليكاسى تاۋەلسىزدىگىنىڭ 25 جىلدىعىنا قوسقان لايىقتى ۇلەس بولىپ سانالادى»، - دەگەن مينيستر وليمپيادا ويىندارىنىڭ بارلىق قاتىسۋشىلارىنا وتانىمىزدىڭ وركەندەۋى جولىندا ودان ءارى دە جەتىستىكتەرگە جەتۋلەرىنە تىلەك ءبىلدىردى.
ريو-دە-جانەيرو قالاسىنداعى جازعى وليمپيادا ويىندارىندا قول جەتكىزگەن جوعارى كورسەتكىشتەرى جانە الەمدىك دەڭگەيدە قازاقستاننىڭ ءيميدجى مەن بەدەلىن ارتتىرعانى ءۇشىن ىشكى ىستەر ءمينيسترى «حالىقارالىق ىنتىماقتاستىقتى دامىتۋعا قوسقان ۇلەسى ءۇشىن» مەدالىمەن دميتري بالاندين، نيجات راحيموۆ، جازيرا جاپپارقۇل، گۋزەل مانيۋروۆا، گالبادراح وتگونتسەتسەگ، فارحات حاركي، كارينا گوريچيەۆا، الەكساندر زايچيكوۆ، ەلميرا سىزدىقوۆا، داريعا شاكيموۆانى ماراپاتتادى.