ەلباسىنىڭ جەكە مۇراعاتىنان الىنعان قۇجاتتار مەن سۋرەتتەر العاش رەت كوپشىلىكتىڭ نازارىنا ۇسىنىلۋدا - فوتو
«تاريحي جانە ساياسي ماڭىزدى وقيعالارعا ەلباسىنىڭ باستامالارى جانە بەلسەندى تۇردە اتسالىسۋى، وتانداستارىمىزدىڭ جوعارى ازاماتتىق بەلسەندىلىگى جانە جۇمىلا بىرىگۋىنىڭ ارقاسىندا قول جەتتى. ەلىمىز ءۇشىن ەلەۋلى قوس اتاۋلى كۇنگە بايلانىستى ەلباسىنىڭ كىتاپحاناسىندا ەكى كورمە سالتاناتتى تۇردە اشىلۋدا»، - دەدى كورمەلەردىڭ اشىلۋ سالتاناتىندا ءسوز سويلەگەن ەلباسى كىتاپحاناسىنىڭ اتقارۋشى ديرەكتورى بەيسەنباي جۇمابەكوۆ.
ونىڭ ءبىرىنشىسى «يادرولىق قارۋسىز الەمنىڭ قازاقستاندىق ۇلگىسى» تاقىرىبىنداعى كورمە. بۇل سەمەي پوليگونىنىڭ جابىلۋىنا ارنالعان.
«1949-1989-جىلدارى ارالىعىندا قازاق دالاسىندا 459 سىناق جۇرگىزىلگەن. بۇل قازاق جەرىنە قاسىرەت اكەلدى. ادام ولىمىنە اكەلگەن الاپات جارىلىستار ەلىمىزدىڭ شىعىس اۋماعىن رادياتسيالىق لاستانۋعا اكەلدى. ازاپتى جىلداردىڭ قاسىرەتىن ءالى دە تالاي ۇرپاقتىڭ سەزىنەرى جاسىرىن ەمەس. ونى جادىمىزعا ساقتاپ، سىناق تاۋقىمەتىنىڭ قايتالانۋىنا جول بەرمەۋىمىز قاجەت»، - دەدى ول.
كورمەدە ق ر تۇڭعىش پرەزيدەنتى جەكە مۇراعاتىنان الىنعان قۇجاتتار مەن سۋرەتتەر العاش رەت كوپشىلىكتىڭ نازارىنا ۇسىنىلىپ وتىر. ەلباسى كىتاپحاناسىنىڭ قىزمەتكەرلەرى جۇرگىزگەن عىلىمي-زەرتتەۋ ەكسپەديتسيانىڭ نۇمىس ناتيجەلەرى دە كورسەتىلگەن. ونىڭ ىشىندە ل. بەريانىڭ كەڭەس دەڭگەيىندە اتوم بومباسىن جاساۋ تۋرالى ستالينگە جازعان حاتتارى، سۋتەگى بومباسىن سىناۋ تۋرالى ۇكىمەتتىك حابارلاما، سىناق الاڭدارىنىڭ سۋرەتتەرى، الاپات جارىلىستان قازا تاپقانداردىڭ ءتىزىمى، وعان كۋا بولعانداردىڭ پىكىرلەرى بار.
ال «قازاقستان رەسپۋبليكاسىنىڭ كونستيتۋتسياسى تاۋەلسىزدىگىمىزدىڭ قۇقىقتىق نەگىزى» تاقىرىبىنداعى كورمەدە قازاقستاننىڭ قۇقىقتىق مەملەكەت رەتىندە قالىپتاسۋىن پاش ەتەتىن ماتەريالدار ۇسىنىلعان. وندا ەلباسىنىڭ جەكە قورىنان الىنعان قۇندى قۇجاتتار قويىلعان. ولاردىڭ اراسىندا ن. نازاربايەۆتىڭ رەداكسيالىق تۇزەتۋلەرى بار ق ر كونستيتۋتسياسىنىڭ جۇمىس نۇسقاسى بار. مۇنان بولەك، 1995-جىلى قابىلدانعان نەگىزگى زاڭ جوباسىنىڭ 19 نۇسقاسىن دا كورۋگە بولادى.
