بوكستان ريو وليمپياداسىنىڭ قولا جۇلدەگەرى داريعا شاكىموۆا الماتىعا ورالدى

وڭتۇستىك استانانىڭ حالىقارالىق اۋەجايىنىڭ VIP- تەرمينالىنىڭ الدىندا داريعانى تۋعان- تۋىستارى، الماتى قالالىق دەنە شىنىقتىرۋ جانە سپورت، جاستار ساياساتى، ىشكى ساياسات باسقارمالارىنىڭ وكىلدەرى، جوعارى سپورتتىق شەبەرلىك مەكتەبى، 10№ بوكس مەكتەبىنىڭ باپكەرلەرى مەن تاربيەلەنۋشىلەرى - بارلىعى 100 دەن استام ادام زور قۋانىشپەن قارسى الدى.
قولدارىنا ترانسپارانتتار مەن تۋ ۇستاعان جۇزدەگەن جاستار داريعا VIP- تەرمينالدان كورىنگەن ساتتە «داريعا - چەمپيون»، «العا قازاقستان» دەپ ۇرانداتتى.
«وتانىمىزعا امان-ەسەن كەلىپ جەتكەنىمىزگە قۋانىشتىمىن. بىزگە قولداۋ كورسەتكەندەرىڭىزگە، تۇنگى ۋاقىت بولسا دا كۇتىپ العاندارىڭىز ءۇشىن بارلىقتارىڭىزعا شىن جۇرەكتەن العىسىمدى بىلدىرەمىن. ءبىز، سپورتشىلار ءۇشىن قازاقستاننىڭ ابىرويىن اسقاقتاتىپ، كوك تۋىن كوككە كوتەرۋ - ۇلكەن مارتەبە. مەن ءوزىم ەلىمىزدىڭ كوك تۋىن كوتەرگەنىمە اسا قۋانىشتىمىن. ودان دا جوعارى كوتەرۋگە ازداپ تاجىريبە، تاكتيكالىق شەبەرلىك جەتىسپەدى. ءبىراق، اللا جازسا، الداعى توكيو وليمپياداسىندا التىن بولادى»، - دەدى د. شاكىموۆا.
سونىمەن قاتار، ول مەدالىن ريو وليمپياداسى الدىندا كوز جۇمعان دوسىنا ارنايتىندىعىن ايتتى.
«مەن بۇل مەدالىمدى وسى ريو وليمپياداسى الدىندا كوز جۇمعان دوسىم ازامات نۇرپەيىسوۆكە باعىشتايمىن. ول دا ءبىز سەكىلدى سپورتشى بولاتىن»، - دەدى د. شاكىموۆا.
داريعا شاكىموۆا برازيليانىڭ ريو-دە-جانەيرو قالاسىندا وتكەن XXXI جازعى وليمپياداسىندا 75 كەلىگە دەيىنگى سالماق دارەجەسىندە ونەر كورسەتتى. بارلىعى شارشى الاڭعا ءۇش رەت شىقتى - 1/8 فينالدا كانادالىق اريان ءفورتيندى 2:1 ەسەبىمەن، 1/4 فينالدا ماروككالىق حادجيدجا ءمارديدى 3:0 ەسەبىمەن جەڭسە، جارتىلاي فينالدا الەم چەمپيونى، 2012-جىلعى لوندون وليمپياداسىنىڭ چەمپيونى كلاريسسا شيلدسكە (ا ق ش) ەسە جىبەرىپ، الدى. ءسويتىپ، قولا مەدالدى قاناعات تۇتتى.
ايتا كەتەلىك، ريو وليمپياداسىنا قازاقستاننان 104 سپورتشى 26 سپورت تۇرىنەن ونەر كورسەتتى. قازاقستاندىق اتلەتتەردىڭ قورجىنىنا 6 سپورت ءتۇرى بويىنشا بارلىعى 17 مەدال ءتۇستى: 3 التىن، 5 كۇمىس جانە 9 قولا. وسىلايشا، 1996-جىلعى اتلانتا وليمپياداسىنان بەرى تاۋەلسىز قازاقستاندا وليمپيادا چەمپيوندارىنىڭ سانى - 19 عا جەتتى.